Жаңа жылды Дубайда қарсы алуға таптырмас мүмкіндік: Отандық лоукостер батыстан жаңа әуе бағытын іске қосады

Редакция
17 қараша 2026, 11:33
Жаңа жылды Дубайда қарсы алуға таптырмас мүмкіндік: Отандық лоукостер батыстан жаңа әуе бағытын іске қосады Сурет авторы: tutu.ru

Отандық FlyArystan лоукостері Орал – Дубай бағыты бойынша тікелей әуе рейстеріне билеттер сатылымын бастады. Жаңа бағыт тұрғындарға Біріккен Араб Әмірліктеріне ауысып отырусыз әрі тиімді бағамен жетуге мүмкіндік береді.

Алғашқы әуе рейсі 2026 жылдың 24 желтоқсанына жоспарланған. Ұшақтар аптасына бір рет - әр бейсенбі сайын қатынайтын болады:

  • Орал – Дубай: ұшу уақыты - 06:20, Дубайға қону - 11:55;

  • Дубай – Орал: ұшу уақыты - 13:00, Оралға қону - 20:25.

Билет бағасы Оралдан Дубайға қарай 65 мың теңгеден, ал кері бағытта 66 мың теңгеден басталады.

Айта кетейік, бұған дейін авиакомпания Ақтаудан Дубайға қатынайтын тікелей рейстерді де қайта жандандырған болатын. Ол бағыттағы ұшақтар сейсенбі және сенбі күндері ұшады.

Қазақстан азаматтарына Біріккен Араб Әмірліктеріне бару үшін виза қажет емес - ел аумағында 30 күнге дейін визасыз жүруге рұқсат етілген. Басты талап - төлқұжаттың жарамдылық мерзімі елге кірген күннен бастап кемінде алты айды құрауы тиіс.

Еске сала кетейік, биыл наурыз айында Таяу Шығыстағы тұрақсыз жағдайға байланысты FlyArystan Ақтау – Дубай рейстерін уақытша тоқтатқан еді. Кейін шектеу мерзімі ұзартылып, қыркүйектің ортасына дейін созылды. Ал қазан айынан бастап Air Astana әуе компаниясы да Алматы мен Астанадан Дубайға тұрақты рейстерін қайта ашқан болатын.

Соңғы жаңалықтар