550 мың түлекке қойылған темірдей тәртіп: Жасанды интеллектпен көшіргендер 10 жыл бойы ЖОО есігін аша алмайды

Редакция
17 қараша 2026, 16:57
550 мың түлекке қойылған темірдей тәртіп: Жасанды интеллектпен көшіргендер 10 жыл бойы ЖОО есігін аша алмайды Сурет авторы: REUTERS/Kim Hong-Ji/Pool/File Photo

Оңтүстік Кореяда осы аптада өтетін жоғары оқу орындарына түсуге арналған ұлттық емтихан кезінде талапкерлерді тексеру шаралары барынша қатаңдатылады. Бұл шара үміткерлердің киімдеріне шағын камералар жасыру қаупінің алдын алу үшін қолға алынып отыр. Бұл туралы сейсенбі күні елдің Премьер-министрі Хан Сон Сук мәлімдеді.

Бейсенбі күні шамамен 550 мың түлек тапсыратын жыл сайынғы академиялық қабілеттілік тесті (CSAT) кезінде бақылаушылар қатысушылардың киімдеріндегі түймелерге арнайы жапсырмалар жабыстырып шығады. Сонымен қатар:

  • Талапкерлердің киім жағаларында жасырын құрылғылардың бар-жоғы тексеріліп, металл іздегіштер қолданылады;

  • Құпия материалдарды суретке немесе видеоға түсіруге мүмкіндік беретін «ақылды» құрылғыларды болдырмау үшін қатысушылардың көзілдіріктері мұқият қаралады;

  • Емтихан тапсырушылар сөмкелері мен жеке заттарын аудиториядан тыс, дәлізде қалдыруға міндетті;

  • Ел бойынша емтихан орталықтарына қосымша 8 400-ге жуық инспектор тартылады.

Үкіметтің мұндай қатаң қадамға баруына жақында салық бухгалтерлерінің ұлттық емтиханында болған үлкен дау түрткі болды. Аталмыш сынақта ең жоғары балл жинаған кореялық азамат жексенбі күні электронды құрылғылар мен генеративті жасанды интеллектті пайдаланып көшіргенін мойындаған. Бұл жағдай қоғамда ұлттық емтихандардың әділдігіне деген үлкен күмән тудырды.

Енді Оңтүстік Корея билігі тест кезінде емтихан сұрақтарының суретке түсіріліп, жасанды интеллект қосымшаларына жіберілген-жіберілмегенін анықтау үшін технологиялық компаниялармен бірлесіп жұмыс істемек.

Премьер-министрдің айтуынша, бұдан былай емтихан кезінде алаяқтық жасап ұсталғандарға қайта тест тапсыруға салынатын тыйым мерзімі 1 жылдан 10 жылға дейін ұзартылады.

«Бұл мұқият тексерістер арқылы сіздерге артық салмақ түсіргіміз келмейді. Бұл - әділ бәсекелестік алаңын қамтамасыз етуге бағытталған ең төменгі қорғаныс шаралары», - деді Хан Сон Сук түлектерге қарата айтқан сөзінде.

Соңғы жаңалықтар