Мальдив аралдарына жету енді екі есе жеңілдейді: Қазақстан маңызды әуе келісіміне қол жеткізді

Редакция
18 қараша 2026, 10:13
Мальдив аралдарына жету енді екі есе жеңілдейді: Қазақстан маңызды әуе келісіміне қол жеткізді Сурет авторы: depositphotos.com

Қазақстан мен Мальдив аралдары екі ел арасындағы тұрақты әуе рейстерінің рұқсат етілген санын екі есеге көбейтуге уағдаласты. Көлік министрлігінің хабарлауынша, енді әр тараптың әуе компаниялары аптасына бұрынғы 7 рейстің орнына 14 рейске дейін орындай алады.

Маңызды келісім Монреаль қаласында өткен ИКАО-ның әуе көлігі жөніндегі жетінші Дүниежүзілік конференциясы аясында жасалды. Кездесуге ҚР Азаматтық авиация комитетінің төрайымы Салтанат Томпиева мен Мальдив Азаматтық авиация басқармасының басшысы Абдул Харис қатысты. Келіссөздер қорытындысы бойынша тараптар әр елдің тағайындалған тасымалдаушылары үшін рейстер лимитін аптасына 14-ке жеткізуді бекітті.

Кездесу барысында екі елдің авиация өкілдері «әуе еркіндігінің» бесінші дәрежесін қолдану арқылы ұшу мәселесін де талқылады. Бұл шетелдік әуе компаниясына өз еліне бара жатқан бағытта екі бөтен мемлекет арасында жолаушылар мен жүк тасымалдауға мүмкіндік беретін құқық. Мұндай қадам әуе тасымалдаушыларға халықаралық бағыттарды ұйымдастыруда қосымша коммерциялық мүмкіндіктер ашады.

Сонымен қатар тараптар екіжақты туристік байланыстарды нығайту және азаматтық авиация саласындағы ынтымақтастықты одан әрі дамыту жолдарын пысықтады.

Соңғы жаңалықтар