Алматылық спортшылар биыл 4,7 мыңнан астам медаль жеңіп алды

Редакция
17 қараша 2026, 19:50
Алматылық спортшылар биыл 4,7 мыңнан астам медаль жеңіп алды Сурет авторы: Pexels

Алматы спортшылары 2026 жылдың алғашқы он айында Қазақстан, Азия және әлем чемпионаттарында 4 727 медаль жеңіп алды. Оның 1 658-і алтын, 1 563-і күміс және 1 506-сы қола, деп хабарлады қала әкімдігі.

Жүлделердің басым бөлігі Қазақстан чемпионаттарында алынған. Ел біріншіліктерінде алматылықтар 4 207 медаль иеленсе, Азия чемпионаттарында 374, әлем чемпионаттарында 146 жүлдеге қол жеткізген.


Биылғы басты жетістіктердің бірі – мәнерлеп сырғанаушы Михаил Шайдоровтың қысқы Олимпиада ойындарында алтын медаль жеңіп алуы.

Азия ойындарына Алматыдан 122 спортшы қатысып, 22 медаль иеленді. Оның біреуі алтын, жетеуі күміс, 14-і қола. Таеквондошы Тамирлан Тлеулес Қазақстан тарихында Азия ойындарының осы спорт түрінен алғашқы алтын медалін жеңіп алды. Ал Дамир Токтаров спорттық құзға өрмелеуден ел қоржынына осы жарыстағы тұңғыш жүлдені салды.

Пара Азия ойындарында Алматының 20 спортшысы төрт алтын, алты күміс және бір қола медаль жеңіп алған.

Алматыда миллионға жуық адам спортпен айналысады

Әкімдік мәліметінше, қалада 955 мың тұрғын немесе халықтың 44 пайызы дене шынықтырумен және спортпен тұрақты айналысады.

Биыл тегін жаттығулар, марафондар мен бұқаралық спорт шараларына 100 мыңнан астам адам қатысқан.

Қалада «Спорт – достық алаңы» және «Almaty Move» тегін жобалары жұмыс істейді. Сонымен қатар балалар футбол лигасына 320 команда мен сегіз мыңнан астам бала қатысады.

Алматыда спорттың 81 түрі дамытылып жатыр. Қалалық спорт басқармасына қарасты 16 мекемеде 17 мың спортшы жаттығады. Мүгедектігі бар адамдарға арналған «Алматы» спорт клубында 756 спортшы бар.

Жаңа стадион мен спорт кешендері салынып жатыр

Қазір Алматыда 3 638 спорт нысаны бар. Қалада 45 мың көрерменге арналған жаңа стадион, гимнастика орталығы және «Авиатор» спорт кешені салынып жатыр. Сондай-ақ «Медеу» мұз айдынын жаңғырту көзделген.

Бұдан бөлек, мүгедектігі бар адамдарға арналған, бір ауысымда 100 адамды қабылдайтын спорт кешенінің құрылысы жүріп жатыр. Онда бассейндер, спорт залдары және емдік дене шынықтыруға арналған орындар болады.

№9 олимпиадалық резервтің мамандандырылған балалар-жасөспірімдер спорт мектебін жаңарту жұмыстары аяқталып, нысан ашылуға дайындалған.

Қалада спорт инфрақұрылымын дамытуға бағытталған тағы сегіз инвестициялық жоба қарастырылған.

Сонымен қатар 10 мың спортшы медициналық бақылаумен қамтылған. Биыл Trinity орталығында 350 спортшы жарақаттан кейін оңалтудан өткен.

Соңғы жаңалықтар