Жемқорлық айыбынан кейін Моңғолия президенті қызметінен кететінін мәлімдеді

Редакция
17 қараша 2026, 10:14
Жемқорлық айыбынан кейін Моңғолия президенті қызметінен кететінін мәлімдеді Сурет авторы: Монцамэ

Моңғолия президенті Ухнаагийн Хурэлсух қызметінен кетуге шешім қабылдады. Бұл тосын мәлімдеме елдегі оппозиция оны жемқорлыққа қатысы бар деп айыптағаннан кейін іле-шала жасалды, деп хабарлайды «Синьхуа» агенттігі.

Мемлекет басшысына қатысты басты кінәратты парламенттегі Демократиялық партия фракциясы көтерген. Оппозиция өкілдерінің пайымдауынша, президент мемлекеттік теміржол құрылысы жобасынан заңсыз қаржы алуы мүмкін.

Ал Ухнаагийн Хурэлсухтың өзі тергеу амалдарымен толық ынтымақтасуға дайын екенін жеткізді. Сондай-ақ ол өз іскерлік беделі мен абыройын қорғау үшін құзырлы органдарға жүгінуге ниетті. Президенттің лауазымын нақты қай күні босататыны әзірге белгісіз.

Айта кетейік, Хурэлсух Моңғолияны 2021 жылдың маусымынан бері басқарып келеді. Оған дейін ол елдің премьер-министрі болған, алайда коронавирус пандемиясы кезіндегі үкімет әрекетіне қарсы жаппай наразылықтардан соң отставкаға кеткен еді.

Еске сала кетейік, биылғы сәуір айында Ухнаагийн Хурэлсух Қазақстанға мемлекеттік сапармен келген болатын. Сол кездесуде Қасым-Жомарт Тоқаев оны еліміздің ең жоғары мемлекеттік наградасы - «Алтын Қыран» орденімен марапаттаған еді. Сонымен қатар қос ел басшылары Астана мен Ұлан-Батыр арасындағы әуе рейстерін қайта жандандыру және тікелей автокөлік қатынасын ашу мәселелерін талқылаған.

Соңғы жаңалықтар