Алматыда Ұлттық кітапхананың жұмыс уақытын 24:00-ге дейін ұзартты

Алматыдағы Қазақстан Ұлттық кітапханасы жұмыс уақытын ұзартты. Енді оқырмандар кітапханаға түн ортасына дейін бара алады. Бұл туралы Мәдениет және ақпарат министрі Арман Қырықбаев шығармашыл қауым мен жастармен кездесуінде айтты.

Шешім оқырмандар саны мен келушілердің өтініштерінің артуына байланысты қабылданды. Жаңа кесте студенттерге, жұмыс істейтін азаматтарға және басқа да келушілерге кітапхана қорлары мен қызметтерін кешкі уақытта пайдалануға мүмкіндік береді.

Деректерге сәйкес, кітапханаға 26 мыңнан астам жаңа оқырман мамыр мен қараша аралығында тіркелді. Бұл өткен жылдың осындай кезеңімен салыстырғанда 73,8%-ға көп.

15–35 жас аралығындағы оқырмандар саны 33%-ға өсіп, 24 мыңнан асты. Яғни кітапхананың жаңа оқырмандарының басым бөлігін жастар құрайды. Келушілерге 1,6 млн-нан астам құжат берілді.

Онлайн-қызметтердің аудиториясы 13%-ға артып, 932 мыңнан астам пайдаланушыға жетті.