WhatsApp арқылы «оңай табыс» ұсынғандардан сақ болыңыз: ІІМ алаяқтардың жаңа айласы туралы ескертті

Редакция
16 қараша 2026, 10:08
WhatsApp арқылы «оңай табыс» ұсынғандардан сақ болыңыз: ІІМ алаяқтардың жаңа айласы туралы ескертті Сурет авторы: depositphotos.com

Қазақстан Республикасы Ішкі істер министрлігі бөгде адамдар үшін SIM-карта тіркеп, WhatsApp аккаунттарын ашу арқылы оңай ақша табу туралы ұсыныстардың аса қауіпті екенін ескертті. Кейіннен мұндай ұялы нөмірлер мен парақшалар қылмыстық мақсатта пайдаланылуы мүмкін.

Ведомствоның мәліметінше, алаяқтар көбіне жасөспірімдер мен жастарға SIM-карта сатып алып, оны өз атына рәсімдеуді, содан соң WhatsApp аккаунтын ашып, растау кодтары мен кіру деректерін беруді ұсынады. Бұл қызметі үшін олар ақшалай сыйақы уәде етеді. Алайда уақыт өте келе аталған нөмірлер мен аккаунттар азаматтарды алдау, қаражат жымқыру, зиянды сілтемелер тарату және жалған парақшалар құру секілді заңсыз әрекеттерге қолданылады.

«Бұл ретте жауапкершілік пен ықтимал құқықтық салдар SIM-карта мен аккаунт кімнің атына тіркелсе, сол азаматтарға да қатысты болуы мүмкін. Себебі олардың жеке деректері құқыққа қайшы схемаларда көрініс табады. Азаматтарды мұндай ұсыныстарға келіспеуге, бейтаныс адамдарға SIM-карта рәсімдемеуге, растау кодтары мен мессенджерлерге кіру мүмкіндігін үшінші тұлғаларға бермеуге шақырамыз», – деп үндеу тастады ІІМ өкілдері.

Министрлік мамандары бұл мәселеге ата-аналардың ерекше назар аударуы қажеттігін атап өтті. Жасөспірімдерге «оңай табыс» туралы кез келген уәденің артында қылмыстық әрекетке тарту қаупі тұрғанын түсіндіру аса маңызды.

Соңғы жаңалықтар