Коучинг ғалымдар мен студенттердің жұмысын қалай жеңілдетеді?

2026 жылдың 12 мамырында Астана қаласындағы Maqsut Narikbayev University базасында Халықаралық коучинг апталығы (ICW 2026) аясында «Коучингтік білім беру мен ғылымды дамыту құралы» атты дөңгелек үстел өтті. Іс-шара Халықаралық коучинг апталығы аясында Халықаралық коучинг федерациясының (ICF Kazakhstan Charter Chapter) қазақстандық бөлімшесі Maqsut Narikbayev University-мен бірлесіп өткізілді. Алғаш рет дөңгелек үстел мемлекеттік тілде өткізілді.

Академиялық қауымдастық өкілдері, кәсіби коучерлер, HR мамандар коучингтің заманауи құзыреттерді қалыптастырудағы және кәсіби өсуді қолдаудағы рөлі туралы пікір алмасты. Сарапшылар коучингті ғылыми-зерттеу жұмыстары тиімділігін арттыратын және стратегиялық басқаруды жетілдіретін маңызды инфрақұрылымдық элемент екенін атап өтті. Дөңгелек үстелді ICF Қазақстан бөлімшесінің директорлар кеңесі мүшесі Ғалымбек Бермағанбетов модераторлық етті.

Талқылауға қатысқан негізгі сарапшылар:

•  Әсел Әбілдаева — MNU Business School директоры
• Алибек Мадибеков — Жоғары білім беруді дамыту ұлттық орталығы
  директоры, ENIС-KAZAKHSTAN
• Даурен Бимов — KIT жаһандық экосистема құрылтайшысы
• Ғабит Бөкенбай — Документалист
• Назгүл Күнбатырова — ICF Қазақстан бөлімшесі директорлар кеңесі мүшесі,
  Этика және сертификаттау бағыты бойынша директор
• Санат Қожахмет — Oxford Brooks Business School, Аға лектор, Қауымдасқан
  профессор
• Әсия Әбілдина — Педагогика ғылымдарының магистрі, AIU шетел
  филологиясы кафедрасының оқытушысы, ЕНУ докторанты

Сарапшылар коучингтің білім беру саласындағы рөлін, оның ғылым мен зерттеулердегі мүмкіндіктерін және халықаралық стандарттарды енгізу тәжірибесін жан-жақты талқылады. Коучинг тек жеке даму құралы ғана емес, сонымен қатар ғылыми-зерттеу жұмыстарының тиімділігін арттыратын және академиялық ортаны жаңа деңгейге шығаратын маңызды элемент ретінде бағаланды.

Халықаралық коучинг федерациясы (ICF) 140-тан астам елде 50 мыңнан астам сертификатталған мамандарды біріктіретін әлемдегі ірі кәсіби ұйым. «ICF Kazakhstan» ҚБ – кәсіби коучингтік мәдениетті дамыту және басқару мен білім беру практикаларының сапасын арттыруға бағытталған коммерциялық емес бірлестік және ICF-тің Қазақстандағы ресми өкілдігі. Жыл сайын мамыр айында бүкіл әлем бойынша Халықаралық коучинг апталығы (ICW) өткізіледі.