Burger King айналасындағы дау ушықты: Жаңа менеджментке қатысты жаңа айыптаулар пайда болды

Желідегі қызу талқыдан кейін Burger King Kazakhstan компаниясы өз қызметкері Әлібек Қаратайдың жұмыстан кетуіне қатысты ресми ұстанымын білдірді. Бұған дейін қызметкердің анасы Жанат Қаратай threads желісінде жазба жариялап, компанияны «ұлыма қысым көрсетіп, жұмыстан шығаруға мәжбүрледі» деп айыптаған болатын.

Оқиғаның мән-жайы

Жанат Қаратайдың айтуынша, оның аутизм диагнозы бар ұлы төрт жыл бойы желі мейрамханаларының бірінде аспаз болып табысты жұмыс істеген. Ол ұжымға толық бейімделіп, өз жұмыс кестесін өзі жоспарлайтын деңгейге жеткен. Алайда, анасының мәлімдеуінше, соңғы уақытта Әлібекке қатысты «қудалау» басталып, оны жұмыстан кетуге мәжбүрлеген.

Компанияның жауабы: «Қызметкер әлі штатта»

Burger King Kazakhstan бұл айыптауларды жоққа шығарып, Әлібектің ресми түрде әлі де жұмыс істеп жатқанын мәлімдеді:

• Заңдылық мәселесі: 6 ақпанда қызметкердің анасы Жанат Қаратай өз атынан жұмыстан шығу туралы өтініш берген. Бірақ ҚР Еңбек кодексіне сәйкес, мұндай өтінішті қызметкердің өзі ғана жаза алады.

• Балама нұсқалар: Компания жағдайды бейбіт реттеу үшін Әлібекті басқа мейрамханаға ауыстыру секілді нұсқаларды ұсынғанын және диалогқа дайын екенін хабарлады.

Ішкі тексеру басталды

Мейрамханалар желісі инклюзивтілік пен кемсітушілікке жол бермеу корпоративтік мәдениеттің ажырамас бөлігі екенін атап өтті. Сонымен қатар қонақтар мен қызметкерлердің қауіпсіздігі мен гигиенасы да басты назарда екенін ескертті.

«Қазіргі уақытта компания ұжым ішіндегі өзара іс-қимыл процестеріне ішкі тексеру жүргізіп жатыр. Мақсатымыз – барлық стандарттардың сақталуын қамтамасыз ету және әрбір қызметкер үшін дұрыс еңбек жағдайын жасау»,  – делінген хабарламада.

Қызметкер Әлібек Қаратайдың анасы Жанат Қаратай екінші мәлімдемесін жасап, компаниядағы еңбек құқықтарының бұзылуы мен корпоративтік мәдениеттің құлдырауы туралы жаңа деректерді жариялады.

«Жүйелі қысым мен кемсітушілік»

Жанат Қаратайдың айтуынша, алғашқы жазбадан кейін оған компанияның бұрынғы және қазіргі қызметкерлерінен көптеген хабарлама түсе бастаған. Жарияланған скриншоттарға сәйкес, ұжымдағы жағдай Ресейден келген жаңа басшылық тағайындалғаннан кейін күрт өзгерген.

Қызметкерлер мен бұрынғы жұмысшылар мынадай мәселелерді алға тартты:

• Төрешілдік пен теңсіздік: Жаңа менеджмент пен қатардағы қызметкерлер арасындағы еңбекақы мен жұмыс жағдайындағы үлкен айырмашылық ұжымның наразылығын тудырған.

• Тіл мәселесі: Ішкі коммуникацияның тек орыс тілінде жүргізілуі қызметкерлердің ашуын туғызған.

• Ұлттық намысқа тию: Жаңа менеджерлердің бірінің жұбайы мейрамхана ішіне қазақстандықтарға қатысты балағат сөз жазылған жапсырма (наклейка) ілгені айтылуда. Бұл ақпаратты жарияламақ болған қызметкерлерге басшылық тарапынан қысым көрсетілген көрінеді.

Құқықтық салдар және қоғамның реакциясы

Жанат Қаратай бұл фактілер расталған жағдайда мәселенің жекелеген емес, жүйелі екенін айтып, жиналған ақпаратты құқықтық баға беру үшін құзырлы органдарға тапсыруға ниетті.

Бұл жағдай желі қолданушыларының ашуын туғызды. Қазақстандықтар 2GIS және өзге де рейтингтік сервистерде Burger King филиалдарына жаппай төмен баға беріп, пікір қалдырып жатыр. Пікірлерде тек Әлібектің жағдайы ғана емес, жергілікті қызметкерлерге деген құрмет, корпоративтік этика және инклюзивті орта мәселелері қызу талқыға түсіп жатыр.