Жапониядағы экс-премьердің өлімі: Сот Тетсуя Ямаганиге қатысты соңғы үкімді шығарды

Жапонияның бұрынғы Премьер-министрі Синзо Абэнің өліміне қатысты сот процесі аяқталып, Тетсуя Ямагани өмір бойына бас бостандығынан айырылды, деп хабарлайды BBC. Қылмыскер өз кінәсін толық мойындағанымен, бұл іс Жапония қоғамында үлкен пікірталас тудырды.

Ямаганидің адвокаттары оны «діни зорлық-зомбылықтың құрбаны» ретінде көрсетуге тырысты. Оның анасы «Бірігу шіркеуіне» (Unification Church) берілгені соншалық, отбасының 100 миллион иен (шамамен 828 000 доллар) қаражатын қайырымдылыққа жұмсап, үй-ішін банкрот қылған. Ямагани экс-премьерді осы даулы ұйыммен байланысы бар деп есептеп, одан кек алуды ұйғарған. Тіпті сотта ол бастапқыда шіркеу басшыларын нысанаға алғанын, бірақ кейін ойы өзгергенін айтты.

Бұл қастандық Жапония билігі мен шіркеу арасындағы астыртын байланыстарды әшкерелеп, бірнеше министрдің қызметтен кетуіне және аталған діни ұйымның мәртебесін қайта қарауға түрткі болды. Синзо Абэнің жесірі Акиэ Абэ соттағы мәлімдемесінде күйеуінен айырылу қайғысының ешқашан басылмайтынын айтып:

 «Мен оның тек тірі болғанын қаладым», - деп көз жасына ерік берді.

Сарапшылардың пікірінше, Ямаганиге деген қоғамдағы жанашырлық оның қылмысын ақтамағанымен, елдегі даулы діни ұйымдарға деген наразылықтың қаншалықты жоғары екенін көрсетті. Дегенмен сот прокурорлардың уәжін қолдап, экс-лидердің өмірін қиған адамға ең ауыр жазаны тағайындады.