2026 жылдың ТОП-5 туристік бағыты: саяхат нарығында жаңа көшбасшылар пайда болды

2026 жылы жаһандық туризм саласы бұрын-соңды болмаған қарқынмен дамып келеді. Бұл ретте негізгі өсім дәстүрлі еуропалық бағыттарда емес, Эфиопия, Бутан және Бразилия сияқты жаңа нарықтарда байқалуда.

БҰҰ Туризм ұйымының (UN Tourism) соңғы есебіне сәйкес, 2025 жылы халықаралық саяхатшылар саны 1,5 миллиардтан асып, пандемияға дейінгі өсім көрсеткіштеріне (жылына 5%) толықтай оралды. Дегенмен қазіргі тренд - туристердің танымал мегаполистерден гөрі, экзотикалық және мәдениеті сақталған елдерге басымдық беруі.

2026 жыл әлемдік туризмдегі үлкен бетбұрыс кезеңіне айналды. Саяхатшылар енді үйреншікті Еуропадан гөрі, болмысы бөлек жаңа елдерге ұмтылуда. Бұл бағытта Бразилия әуе қатынасын реттеу арқылы рекордтық 37% өсім көрсетсе, Бутан табиғат пен тыныштықты бағалайтындардың есебінен келушілер санын 30%-ға арттырды. Мысыр жаңа алып мұражайының арқасында 20% өсімге қол жеткізсе, қауіпсіздік мәселесін шешкен Эфиопия (+15%) мен отбасылық демалыс орталығына айналған Сейшель аралдары (+13%) алғашқы бестікке енді. Қазіргі саяхатшы үшін басты құндылық - көпшілік көп баратын жер емес, мәдениеті мен табиғаты қаз-қалпында сақталған бірегей мекендерді ашу.

Мысыр: Мұражай мен «баяу саяхат» тренді

Мысырға келушілердің күрт артуына Гиза пирамидаларының жанындағы Ұлы Мысыр мұражайының ресми ашылуы себеп болды. Сонымен қатар елде «баяу саяхат» (slow travel) концепциясы танымал болып келеді. Үлкен круиздік кемелердің орнына туристер Нил өзенімен шағын дәстүрлі ағаш қайықтармен (дахабия) жүзуді және ауылдар арқылы өтетін велотурларды таңдауда.

Бразилия: Люкс және әуе байланысы

Бразилия туризмді мемлекеттік деңгейде қолдау арқылы рекордтық көрсеткішке жетті. Жаңа халықаралық рейстерді субсидиялау және «Visit Brasil» бағдарламасы елге жаңа типтегі — «саналы люкс» іздеушілерді тартты. Туристер тек Рио-де-Жанейромен шектелмей, Амазонка өлкесінің тағамдары мен Беленнің тарихи базарларын зерттеуге көшкен.

Бутан: Бақыт пен тұрақтылықты бағалайтындар үшін

Бутан Корольдігі әлемдегі ең қымбат туристік жарнаны (тәулігіне 100 доллар) енгізгеніне қарамастан, келушілер саны 30%-ға артты. Бұл қаражат елдің инфрақұрылымын дамытуға жұмсалады. Бутан қазіргі заманғы «саяхаттан шаршау» синдромының еміне айналып, рухани кемелдік пен оқшаулануды қалайтын саяхатшылардың таңдауына айналды.

«Revigorate» консалтингтік фирмасының бас директоры Стивен Вигордың айтуынша, заманауи саяхатшылар үшін ең басты құндылық - бірегей мәдениет пен ашылмаған жерлерді көру мүмкіндігі.

«Ерекше болмысы бар және жол қатынасы реттелген елдер - бұл жаңа дәуірдің жеңімпаздары», - дейді ол.