Жанармай қымбаттауына байланысты Еуропа әуекомпаниялары билет құнын көтерді

Иран төңірегіндегі қарулы қақтығыстардан кейін авиациялық керосиннің күрт қымбаттауы аясында еуропалық әуе тасымалдаушылары билет бағасын көтере бастады, деп хабарлайды Politico.

Lufthansa басшысы Карстен Шпордың мәлімдеуінше, сала өсіп жатқан шығындарды өз бетінше өтей алмайды: бір жолаушыдан түсетін орташа пайда шамамен 10 еуроны құрайтындықтан, қосымша шығындар клиенттердің иығына жүктелуде.

Салалық дереккөздердің мәліметі бойынша, осы аптада Еуропаға жеткізілетін керосин бағасы тоннасына 1700 долларға жақындады — бұл әскери қимылдар басталғанға дейінгі деңгейден екі есе жоғары. Бағаның өсуі Таяу Шығыстағы шиеленісті жағдаймен және отын жеткізудегі тәуекелдермен байланысты.

Кейбір тасымалдаушылар қазірдің өзінде рейстер санын қысқартуда. Мәселен, скандинавиялық SAS әуе компаниясы мыңға жуық ұшуды, ең алдымен Норвегия ішіндегі ішкі рейстерді тоқтататынын жариялады. Компания өкілдері отынның қымбаттауы бүкіл авиация саласына ауыр соққы болғанын айтты.

Таяу Шығыстағы тұрақсыздық салдарынан Еуропада авиакеросин бағасы екі есе, ал Азияда пайдалану шығындары үш есе өсті, деп хабарлайды Reuters агенттігі. American Airlines әуе компаниясы наурыз айында 400 миллион доллар көлемінде қосымша шығын болатынын мәлімдеді. Тасымалдаушының түсіндіруінше, шығындардың өсуі көбіне тарифтерді көтеру арқылы өтеледі, өйткені отын еңбекақыдан кейінгі екінші ірі шығын бабы болып қала береді. Ескерте кетсек, қақтығыс өршігенге дейін авиаотын бағасы барреліне 90 доллар шамасында болса, қазір ол шамамен 200 долларға жетті.