Үндістан әлеуметтік желілердегі бақылауды қатаңдатты: Заңсыз контентті өшіруге 3 сағат қана беріледі

Үндістан үкіметі әлеуметтік желі компанияларына заңсыз мазмұндағы материалдар туралы хабарлама алған сәттен бастап, оны өшіру үшін небәрі үш сағат уақыт берілетінін мәлімдеді. Бұл талап Meta, YouTube және X (бұрынғы Twitter) сияқты технологиялық көшбасшылық компаниялар үшін үлкен сынақ болмақ, деп хабарлайды Reuters.

Сейсенбі күні жарияланған бұл өзгерістер 2021 жылғы IT-ережелеріне түзетулер енгізді. Бұған дейін заңсыз контентті жоюға 36 сағат берілетін болса, енді бұл уақыт 12 есеге қысқарды. Жаңа ережелер 20 ақпаннан бастап күшіне енеді.

Бұл қадам Үндістанның әлемдегі интернет-мазмұнды ең қатал реттейтін елдердің бірі ретіндегі ұстанымын нығайта түспек. Мамандардың пікірінше, 1 миллиард интернет пайдаланушысы бар нарықта мұндай қысқа мерзімде талаптарды орындау іс жүзінде мүмкін емес.

 «Әлеуметтік желілерге контентті 3 сағатта өшіру техникалық тұрғыдан өте қиын. Бұл ереже платформалардың қарсылық таныту немесе мәселенің мән-жайын саралау мүмкіндігін шектейді», - дейді технологиялық құқық жөніндегі сарапшы Акаш Кармакар.

Түзетулерде жасанды интеллект (ЖИ) арқылы жасалған мазмұнды белгілеу талаптары да қозғалды. Бұған дейін ЖИ-контенттің 10%-ын міндетті түрде таңбалау туралы ұсыныс айтылса, жаңа ережеде мұндай мазмұнның жай ғана «анық көрінетіндей белгіленуі» (prominently labelled) жеткілікті деп бекітілді.

Соңғы жылдары Үндістан үкіметі ұлттық қауіпсіздік пен қоғамдық тәртіпке қауіп төндіретін ақпараттарды өшіру бойынша мыңдаған бұйрық шығарған. Мәселен, Meta компаниясының есебі бойынша, 2025 жылдың алғашқы алты айында ғана Үндістан билігінің сұрауымен 28 000-нан астам материалға шектеу қойылған.