Түркия әуе кеңістігіне бағытталған зымыран атып түсірілді: Ердоған Иранға ескерту жасады

Түркия президенті Режеп Тайып Ердоған елдің әуе кеңістігіне бағытталған зымыран оқиғасына байланысты Иранға ескерту жасады.

Түркия Қорғаныс министрлігінің мәліметінше, баллистикалық зымыран Иран аумағынан ұшырылып, Ирак пен Сирияның әуе кеңістігі арқылы Түркия бағытына қарай ұшқан. Зымыран түрік әуе шабуылына қарсы қорғаныс жүйелері арқылы нысанаға жетпей жатып атып түсірілген.

– Өңіріміз күрделі кезеңді бастан өткеріп жатқан осындай күндері біз шекараларымыз бен әуе кеңістігіміздің қауіпсіздігін ешқашан кездейсоқ жағдайға қалдырмаймыз. Бүгінгі оқиғадағыдай, біз НАТО-дағы одақтастарымызбен тығыз байланыстамыз, барлық қажетті шараларды қабылдап, жедел әрекет етеміз. Мұндай жағдайлар қайталанбауы үшін ескертулерімізді барынша анық жеткізіп отырмыз, – деді Ердоган.

Түркия Қорғаныс министрлігі ел кез келген дұшпандық әрекетке жауап беру құқығын өзінде қалдыратынын мәлімдеді. Сонымен қатар Анкара аймақтағы шиеленістің одан әрі ушығуына әкелуі мүмкін қадамдардан бас тартуға шақырды.

Ведомство Түркияның жағдайға байланысты НАТО және өзге де одақтастарымен кеңесуді жалғастыратынын хабарлады.

Түрік ақпарат құралдарының мәліметінше, зымыранның ықтимал нысанасы АҚШ-тың ядролық авиациялық бомбалары сақталатын НАТО-ның «Инджирлик» әскери базасы болуы мүмкін.

Түркия телеарналары атып түсірілген ирандық зымыранның алғашқы сынықтары табылғанын көрсетті.