Трамп пен Иран арасындағы соғыс тоқтай ма? Ақ үйдің «15 тармақты» құпия жоспары белгілі болды

АҚШ Президенті Дональд Трамп Иранмен арадағы әскери қақтығысты тоқтату мақсатында жүргізіліп жатқан келіссөздерде айтарлықтай ілгерілеушілік бар екенін мәлімдеді. Ақ үй басшысының сөзінше, тараптар соғыс қимылдарын тоқтату үшін өзара тиімді мәмілеге келуге мүдделі, деп забарлайды Reuters.

Америкалық БАҚ-тың хабарлауынша, Вашингтон Тегеранға қақтығысты реттеудің 15 тармақтан тұратын кешенді жоспарын жолдаған. Аталған құжатта Иранның ядролық бағдарламасын толық тоқтату, аймақтағы прокси-топтарды қаржыландырудан бас тарту және әлемдік энергия тасымалы үшін стратегиялық маңызы бар Ормуз бұғазын қайта ашу мәселелері қарастырылған.

Президент Трамп Иран тарапының энергетика және навигация қауіпсіздігі саласында маңызды жеңілдіктер жасағанын атап өтіп, бұл қадамды жоғары бағалады. Өз кезегінде Иран билігі БҰҰ Қауіпсіздік Кеңесіне жолдаған мәлімдемесінде, Иран билігімен үйлестірілген жағдайда «дұшпандық ниеті жоқ» кемелердің Ормуз бұғазы арқылы өтуіне рұқсат берілетінін растады.

Сонымен қатар Пәкістан Президенті Шехбаз Шариф екі ел арасындағы келіссөздерді өз елінде өткізуге дайын екенін білдірді. Ресми Исламабад бұл бастаманы толық қолдайтынын және жан-жақты бітімге келу үшін делдалдық етуге ниетті екенін жеткізді.

Дегенмен дипломатиялық талпыныстарға қарамастан, АҚШ Қорғаныс министрлігі аймақтағы әскери әлеуетін арттыруды жалғастыруда. Алдағы уақытта Таяу Шығысқа 82-ші әуе-десанттық дивизиясының мыңдаған сарбазы қосымша жіберіледі деп күтілуде.