Студенттердің банк карталары бақыланады: Парламентте маңызды бастама көтерілді

Қазақстанда қаржылық қылмыстардың алдын алу үшін 14 пен 22 жас аралығындағы азаматтардың ақша аударымдарына қосымша биометриялық сәйкестендіруді (бет-әлпетті тану) енгізу ұсынылды. Мұндай бастаманы Құрылтай депутаты Дидарбек Ділдабек көтерді.

Депутаттың айтуынша, оқу жылының басында студенттер банкте есепшот ашып, оны оңай табыс табу мақсатында басқа тұлғаларға «арендаға» береді. Алайда жастар мұндай заңсыз қаржылық операциялардың салдары мен заң алдындағы жауапкершілікті жете түсіне бермейді.

«Оқу орындарындағы алдын алу жұмыстарында олқылықтар бар. Құқық қорғау органдары мен педагогтар, психологтар арасында жүйелі байланыс жоқ. Жастарға ақпаратты өздеріне түсінікті тілде жеткізу әдістерін жаңарту қажет», - деді Дидарбек Ділдабек.

14–22 жас аралығындағы жастар 50 мың теңгеден асатын ақша аударымын жасағанда қосымша биометриялық тексерістен өтуін қамтамасыз ету.

Сонымен қатар жастарды қаржылық қылмыстардан қорғау үшін бірқатар қосымша шара ұсынылды:

• Банктер, құқық қорғау органдары мен оқу орындары арасында жедел ақпарат алмасуды жолға қою;

• Биыл 1-курсқа түскен студенттерге оқудың алғашқы 15 күнінде банк карталарын бөгде адамдарға бермеу және есірткі қылмыстары туралы түсіндіру жұмыстарын жүргізу;

• «Отбасының цифрлық картасы» арқылы әлеуметтік осал топтағы жастарға мекенжайлық көмек пен азық-түлік, киім-кешек ваучерлерін беру;

• Студенттерге муниципалдық кәсіпорындарда күнделікті төлемі бар қысқамерзімді жұмыс орындарын ұйымдастыру.