Шоты бұғатталған қазақстандықтардың негізгі қажеттіліктеріне ақша қалдыру ұсынылды

Қазақстанда есепшоты бұғатталған қарыз алушылардың күнделікті тіршілікке қажетті минималды қаражатын тиіспей сақтап қалу ұсынылды. Мұндай талаптар банктік және микроқаржылық несие шарттарында міндетті түрде жазылуы тиіс. Бұл туралы Құрылтай депутаты Алмас Мұхаметов мәлімдеді.

Депутат келтірген Қаржы нарығын реттеу және дамыту агенттігінің мәліметінше, 90 күннен астам мерзімі өткен проблемалық кредиттердің сомасы 1,8 триллион теңгеге жеткен. Ал Әділет министрлігінің дерегі бойынша 1,5 миллионнан астам азаматтың банк есепшоттары атқарушылық өндіріс аясында бұғатталған.

«Әрине, азамат алған қарызын қайтаруы тиіс. Бірақ қазір төлемдердің көбі цифрлық форматта жүргізілетінін ескерсек, шоты бұғатталған адам қалай өмір сүреді? Ол көлікке, байланысқа, суға, электр қуатына, жылуға қалай төлейді? Тамақ пен дәрі-дәрмекті қалай сатып алады? Табысы қолына тимеген адамның жұмыс істеуге деген ынтасы жоғалады. Тек тұрақты табысы бар азамат қана қарызын өтей алады», - деді Алмас Мұхаметов.

Заң бойынша должниктердің шотында табысының кемінде 50%-ы және өмір сүруге қажетті ең төменгі сома қалдырылуы тиіс. Проблема сонда, іс жүзінде бұғаттау салынғаннан кейін азаматтар бұл қаражатты пайдалана алмай қалады.

Осыған байланысты депутат мынадай шараларды ұсынды:

• Несие шартында қарыз алушының өмір сүруіне қажетті ең төменгі соманы сақтау туралы тармақты міндетті ету;

• Бұл процедураны банк жүйесі арқылы автоматты түрде жүзеге асыру мүмкіндігін қарастыру;

• Шотқа шектеу қойылған кезде азаматтың негізгі қажеттіліктерге жұмсайтын қаражатын пайдалану тәртібін нақты белгілеу.