Өзбекстан алғашқы АЭС құрылысын бастады

2026 жылғы 24 наурызда Өзбекстанның Жызақ облысында болашақ атом электр станциясының нысандарын салудың бастапқы кезеңі ресми түрде басталды, деп хабарлайды podrobno.uz. Бұл шара жобаның дайындық кезеңінен тікелей құрылыс сатысына өткенін айғақтайды.

Фариш ауданындағы құрылыс алаңында қуаттылығы 55 МВт болатын «РИТМ-200Н» шағын реактор ғимаратының іргетасын қалау жұмыстары қолға алынды. Құрылыстың бұл циклі көлемі 900 текше метр болатын бетон негізін дайындауды, сондай-ақ қажетті гидрооқшаулау және жерге тұйықтау шараларын қамтиды. Мамандардың жоспары бойынша, бұл жұмыстар ағымдағы жылдың сәуір айында толық аяқталуы тиіс.

Жобаның іске асуына Өзбекстан Президенті Шавкат Мирзиёев тікелей қолдау көрсетіп отыр. Құрылыс жұмыстары басталмас бұрын Өнеркәсіптік, радиациялық және ядролық қауіпсіздік комитетінен тиісті рұқсат алынып, алаңның техникалық стандарттарға, соның ішінде сейсмикалық қауіпсіздік талаптарына толық сәйкестігі расталды.

Жаңартылған стратегиялық келісімге сәйкес, Жызақ АЭС-і бірегей құрылымға ие болады. Станция құрамына ВВЭР-1000 типті екі ірі энергия блогы мен «РИТМ-200Н» реакторының екі блогы кіреді. Жобалық қуаттылыққа ие болғаннан кейін станция жылына шамамен 15,4 миллиард кВт·сағ электр энергиясын өндіреді. Бұл көрсеткіш республикадағы жалпы тұтыну көлемінің 15%-дан астамын қамтамасыз етіп, елдің энергетикалық тәуелсіздігін нығайтуға мүмкіндік береді.

Сонымен қатар «Өзатом» агенттігі мен «Росатом» мемлекеттік корпорациясы арасындағы ынтымақтастық аясында жоғары білікті кадрлар даярлау және ядролық нысандарды қауіпсіз пайдалану мәселелері бойынша стратегиялық жол картасы бекітілді. АЭС-тің есептік қызмет ету мерзімі кемінде 60 жылды құрайды.