Олимпиада қарсаңындағы саяси дау: Милан мұздай қаруланған америкалықтарды қабылдағысы келмейді

2026 жылғы Қысқы Олимпиада ойындары басталар алдында Италия мен АҚШ арасында күтпеген саяси жанжал өршіп тұр. Даудың басы - АҚШ-тың Ішкі қауіпсіздік министрлігі өз делегациясының қауіпсіздігін күзету үшін елге ICE (Көші-қон және кедендік бақылау қызметі) агенттерін жіберу туралы шешімінен басталды, деп хабарлайды Reuters.

 Ресми Уашингтон бұл қызметкерлердің тек адам саудасы мен есірткі тасымалы сияқты трансұлттық қылмыстардың тәуекелін бағалайтынын айтқанымен, Италия саясаткерлері мен Милан мэриясы бұл қадамға шұғыл наразылық білдірді.

Бұл қарсылықтың астарында АҚШ-тың Миннесота штатында орын алған соңғы қанды оқиғалар жатыр. Осы жылдың қаңтар айында ICE агенттерінің қатысуымен екі адам атып өлтірілді. 7 қаңтарда 37 жастағы Рене Николь Гуд агент оғынан қаза тапса, 24 қаңтарда федералды операция кезінде тағы бір АҚШ азаматы Алекс Претти қаза болды. Екі жағдайда да биліктің ресми мәлімдемелері куәгерлердің видеожазбаларымен сәйкес келмей, Америкада үлкен наразылық толқынын тудырған болатын.

Милан мэрі Джузеппе Сала ICE агенттерін «адам өлтіретін жасақтар» деп атап, оларды өз қаласында көргісі келмейтінін ашық мәлімдеді. Оппозициялық партиялар мен солшыл кәсіподақтар тіпті Олимпиаданың ашылу салтанаты күніне, яғни 6 ақпанға жоспарланған «ICE OUT» атты шеру өткізетіндерін хабарлады.

Италия үкіметі жағдайды ушықтырмау үшін агенттердің тек АҚШ консулдығы аумағында болатынын және қала көшелеріндегі тәртіпке араласпайтынын айтып, түсіндіру жұмыстарын жүргізуде. Елдің Сыртқы істер министрі Антонио Таяни халықты сабырға шақырып:

«Бұл агенттер - Миннеаполис көшелерінде қантөгіс жасағандар емес. Оларды фашистік баскесерлердей көріп, байбалам салудың еш қажеті жоқ», - деп, америкалық әріптестерін қорғауға тырысты.

Дегенмен Олимпиада қарсаңындағы бұл шиеленіс спорттық мерекенің саяси астарына көлеңке түсіріп тұр.