Нью-Йорк тарихындағы ең ірі ереуіл: 15 мың мейірбике жұмысты тоқтатты

12 қаңтарда Нью-Йорктің 15 мыңға жуық мейірбикесі жалақыны көтеруді және еңбек жағдайын жақсартуды талап етіп, ереуілге шықты, деп хабарлайды ABC News агенттігі. Бұл қала тарихындағы мейірбикелердің ең ірі наразылық шарасы деп танылып отыр.

Нью-Йорк штаты мейірбикелер қауымдастығының (NYSNA) мәліметінше, кәсіподақ пен аурухана өкілдері алдын ала келісімге келе алмағандықтан, мегаполистегі төрт ірі емхананың қызметкерлері жұмыс істеуден бас тартқан. Олар жалақыны өсіруді, толық медициналық сақтандыру мен зейнетақымен қамсыздандыруды, сондай-ақ жұмыс орнындағы зорлық-зомбылықтан қорғауды талап етуде. Мейірбикелердің 2023 жылғы ереуілден кейін жасасқан келісімшарт мерзімі 31 желтоқсанда аяқталған болатын.

«Өкінішке қарай, аурухана басшылары науқастарға қауіпсіз күтім жасаудан гөрі пайда табуды жоғары қойды. Біз науқастарымыздың қасында болғымыз келгенімен, олар бізді ереуілге шығуға мәжбүрледі», – деп мәлімдеді NYSNA президенті Нэнси Хаганс.

Нью-Йорк штатының губернаторы Кэти Хочул ереуілге байланысты төтенше жағдай жариялап, тараптарды тезірек ортақ мәмілеге келуге шақырды. Бірқатар шенеулік, соның ішінде штаттың бас прокуроры Летиция Джеймс мейірбикелерді қолдайтынын білдірді.

«Мейірбикелер Нью-Йорк тұрғындарының денсаулығы үшін күн сайын өз бастарын қатерге тігеді. Оларды өз қауіпсіздігі мен әділ келісімшарт арасында таңдау жасауға мәжбүрлемеу керек. Мен қала ауруханаларын пайданы емес, пациенттерді бірінші орынға қоюға шақырамын», – деді Летиция Джеймс.

Аурухана өкілдері жұмыстағы іркілістерге қарамастан, медициналық көмек көрсетуді жалғастыруға дайын екендіктерін жеткізді. Сондай-ақ олар пациенттерге шұғыл жағдайларда медициналық көмекке жүгінуді кейінге қалдырмауға кеңес берді.