Непалда 19 адамның өлімінен кейін әлеуметтік желілерге қойылған тыйым алынды

Непал үкіметі жаппай наразылықтан кейін әлеуметтік желілерге енгізілген тыйымды жойды. Бұл туралы елдің коммуникациялар министрі Притхви Суббу Гурунг мәлімдеді. Оның айтуынша, шешім дүйсенбі күні «Z буынының талабына жауап ретінде» қабылданған, деп хабарлады BBC-дің орыс қызметі.

Соңғы күндері Жоғарғы соттың шешімімен тіркелмеген және контентті бақылауға келіспеген 26 әлеуметтік желіге тыйым салынған болатын. Олардың қатарында Facebook, X (Twitter), YouTube секілді әлемге танымал платформалар бар. Бұл шешім қоғамда үлкен ашу-ыза тудырды.

Дүйсенбі күні мыңдаған адам Катмандудағы парламент ғимаратына жиналып, биліктің шешіміне қарсылық білдірді. Полиция шерушілерге су атқыштар, дубинка, резеңке оқ және көз жасаурататын газ қолданды. Ресми мәлімет бойынша, қақтығыс кезінде кемінде 19 адам қаза тапқан: 17-сі Катмандуда, екеуі шығыстағы Итахари қаласында.

Жарақат алғандар ауруханаларға жеткізілді. Катмандудағы бір емхана қызметкері газдың аурухана ішіне кіріп, дәрігерлердің жұмысын қиындатқанын айтты.

БҰҰ дерегінше, Непалда әлеуметтік желілерді миллиондаған адам пайдаланады, ең танымал платформалардың бірі – Instagram. Жергілікті тұрғындар әлеуметтік желілерді тек ойын-сауық немесе жаңалық үшін ғана емес, бизнес пен туризм үшін де маңызды құрал деп санайды.

Наразылар қолдарына «Жетер!» және «Жемқорлықты тоқтатайық!» деген ұрандар жазылған плакаттар ұстап шықты. Белсенділердің айтуынша, әлеуметтік желілерге тыйым – наразылықтың соңғы себебі ғана, ал негізгі мәселе – елдегі жемқорлық пен биліктің уәдесін орындамауы.

Катмандудың кей аудандарында коменданттық сағат енгізілді. Оппозиция мен қоғам өкілдері наразылық тоқтамайтынын, «өз дауыстарын билік естімейінше көшеден кетпейтіндерін» мәлімдеді.