Мысырда Газа жөніндегі декларацияға қол қойылды: Трамп Таяу Шығыста бейбітшілік орнағанын мәлімдеді

АҚШ, Мысыр, Қатар және Түркия көшбасшылары Шарм-эш-Шейх қаласында өткен саммит барысында Газа секторында атысты тоқтату жөніндегі декларацияға қол қойды. Құжат Дональд Трамп ұсынған 20 тармақтан тұратын бейбіт жоспар негізінде және халықаралық делдалдардың қатысуымен әзірленген.

Саммит кезінде сөз сөйлеген АҚШ Президенті Дональд Трамп бұл келісімді «тарихи жетістік» деп атап өтті.

«Біз бәрі мүмкін емес деп санаған нәтижеге қол жеткіздік. Ақыры Таяу Шығыста бейбітшілік орнады», – деді Трамп жиында жиналған жиырмаға жуық мемлекет басшылары алдында.

Бұл күн Таяу Шығыстағы соғысты тоқтату жолындағы маңызды кезең болды: Израильге екі жылдан астам тұтқында болған барлық тірі тұтқындар қайтарылды, ал шамамен екі мың палестиналық тұтқын мен сотталған азамат өз жеріне оралды.

«Сенесіз бе, осы сәтке жету үшін үш мың жыл қажет болды. Енді бұл бейбітшілік сақталады», – деді Трамп.