Мәскеуде көлік жарылысынан Ресей Бас штабының генералы қаза тапты

Мәскеудің оңтүстігінде автокөліктің жарылуы салдарынан Ресей Қарулы күштері Бас штабының жедел даярлық басқармасының бастығы, генерал-лейтенант Фанил Сарваров қаза тапты. Оның жарақаттан көз жұмғанын Ресейдің Тергеу комитеті растады.

Оқиға 22 желтоқсан күні таңғы сағат 7:00 шамасында Мәскеудегі Ясеневая көшесінде орналасқан автотұрақта болған. Алдын ала мәліметке сәйкес, генерал көлігіне отырып, бірнеше метр жүрген сәтте жарылыс болған. Тергеу нұсқасы бойынша, автокөліктің түбіне қолдан жасалған жарылғыш құрылғы орнатылған.

Ресей Тергеу комитеті қылмыстың бірнеше нұсқасын қарастырып жатқанын мәлімдеді. Соның бірі – бұл оқиғаның Украина арнайы қызметтерімен байланысы болуы мүмкін деген болжам. Аталған дерек бойынша адам өлтіру және жарылғыш заттарды заңсыз айналымға түсіру баптарымен қылмыстық іс қозғалды.

«Проект» басылымының жазуынша, Фанил Сарваров бұрын Осетин-ингуш қақтығысына, Шешенстандағы соғыс қимылдарына, Сириядағы операцияларға және Украинадағы әскери іс-қимылдарға қатысқан.