Қырғызстандағы күтпеген отставка: Садыр Жапаров Камчыбек Ташиевті қызметінен босатты

Қырғызстан Президенті Садыр Жапаров елдегі ең ықпалды шенеуніктердің бірі, өзінің жақын серігі Камчыбек Ташиевті Мемлекеттік ұлттық қауіпсіздік комитетінің (МҰҚК) төрағасы және Министрлер кабинеті төрағасының орынбасары қызметінен босату туралы жарлыққа қол қойды.

Көпжылдық достық пен саяси одақтың аяқталуы ма?

Камчыбек Ташиев осы уақытқа дейін Жапаровтың ең сенімді серігі әрі жақын досы саналып келді. Олардың саяси жолы 2010 жылы «Мекенчил» партиясын бірге құрудан басталған. Екеуі де бірге наразылық акцияларына қатысып, қудалауға ұшыраған. 2020 жылы Ташиев бастаған жақтастары Жапаровты түрмеден босатып, билікке келуіне тікелей ықпал еткен болатын. Сарапшылар Ташиевті елдегі «бейресми вице-президент» деп атайтын.

Ресми себеп: «Елдегі іріткіге жол бермеу»

Президенттің баспасөз хатшысы Аскат Алагозов бұл шешімнің астарын түсіндірді. Оның айтуынша, Жапаров мұндай қадамға мемлекет мүддесі үшін және қоғамда, соның ішінде мемлекеттік құрылымдар арасында жік шығуына жол бермеу үшін барған. Мақсат – ел бірлігін нығайту.

Жаңа тағайындау

МҰҚК төрағасының міндетін уақытша атқарушы болып Жумгалбек Шабданбеков тағайындалды. Ол 2020 жылдан бері осы ведомство басшысының орынбасары қызметін атқарып келген.