Қырғызстанда Ташиев айт намазынан кейін жұрттан кешірім сұрады

Қырғызстан ҰҚК-нің бұрынғы басшысы Қамшыбек Ташиев айт намазынан кейін қоғамнан кешірім сұрады. Бұл оның атына қатысты тергеулер жүріп жатқан кезеңге тұспа-тұс келіп отыр, деп хабарлады Азаттық Азия.

Ташиев өз сөзінде өзі туралы «өсек пен жалған ақпарат» тарағанын айтып, жұртшылықтан кешірім сұраған.

«Алланың разылығы үшін және айт намазы құрметіне ренжіткен әрбір мұсылманнан кешірім сұраймын. Сондай-ақ мен туралы өсек айтып, жалған ақпарат таратқандардың барлығын кешірдім», – деді ол.

Ол нақты кімдерді меңзеп отырғанын ашып айтпады.

БАҚ мәліметінше, Ташиев айт намазын мешіттердің бірінде оқыған. Әлеуметтік желіде тараған видеоларда оның жанында Ош қаласының бұрынғы әкімі Жеңішбек Токторбаев та көрінеді.

Ташиевтің көпшілік алдына қайта шығуы қылмыстық істер аясында болып отыр. 19 наурызда ол шетелден Бішкекке оралып, ІІМ-де тергеуге шақырылған, кейін босатылған.

Дереккөздердің хабарлауынша, тергеу «Қырғызмұнайгаздағы» жемқорлық және «75 адамның үндеуі» деп аталатын істерге байланысты жүргізілуде. Сондай-ақ ол жария етпеу туралы келісімге қол қойғаны айтылады.

Бұған дейін билік «Қырғызмұнайгаздағы» жемқорлық схемалар салдарынан мемлекетке 3 млрд сомнан астам шығын келгенін мәлімдеген.

Еске салайық, Қамчыбек Ташиев 10 ақпанда президент Садыр Жапаровтың жарлығымен қызметінен босатылған еді. Одан кейін оның айналасындағы бірқатар шенеунік те қызметтен кетіп, кейбірі қамауға алынған.