Қырғызстанда дәрігерлерге «шайпұлдың» заңды баламасын енгізу ұсынылды

Қырғызстанның Әділет министрі әрі вице-премьері Аяз Баетов дәрігерлерге арналған ерікті қосымша төлем тетігін – «шайпұлдың» заңды түрін енгізуді ұсынды. Бұл туралы ол 19 тамызда өткен бюрократияны азайту жөніндегі ведомствоаралық комиссия отырысында мәлімдеді, деп хабарлайды үкіметтің «ГОСИНФО» Telegram-арнасы.

"Даяшыға шайпұл беру – жақсы әдет, ал дәрігерге шайпұл беру – пара болып саналады. Бұл дұрыс емес! Біз комиссия қарауына қаржылық дербестік аясында ерікті қосымша төлем ұғымын ұсынып отырмыз", – деді Баетов.

Оның айтуынша, дәрігерлерге алғыс ретінде ақша беру қазірдің өзінде бар, әсіресе перзентханаларда жиі кездеседі. Бірақ заңдық тұрғыдан мұндай әрекет парақорлық болып бағалануы мүмкін. Жаңа тетік бұл қатерлерді азайтып, төлемдерді ашық жүргізуге мүмкіндік бермек.

Ұсыныс бойынша, мұндай қосымша төлемдер тек қызмет көрсетілгеннен кейін касса арқылы қабылданып, белгіленген шекте болуы керек. Мәселен, 3–5 мың сом көлемінде (шамамен 34–57 доллар). Сонымен қатар төлемнің ерікті жасалғаны цифрлық түрде тіркеледі.

Баетов атап өткендей, әңгіме параны заңдастыру емес, керісінше, дәрігерлердің жалақысын көтерудің қосымша жолын табу туралы болып отыр. Бұл, әсіресе, жеке секторға немесе шетелге кетіп жатқан медицина қызметкерлерін елде ұстап қалуға ықпал етуі мүмкін.