Кореядағы саяси элитаның құлауы: Экс-президенттің жұбайы Ким Кен Хи 20 айға сотталды

Оңтүстік Кореяның саяси сахнасында ірі сілкініс орын алды: Сеул орталық округтік соты елдің бұрынғы басшысы Юн Сок Ёльдің жұбайы Ким Кен Хиге қатысты үкім шығарды. Мемлекеттік деңгейдегі жемқорлық дауына нүкте қойған сот шешіміне сәйкес, Ким Кен Хи 1 жыл 8 айға бас бостандығынан айырылды, деп хабарлайды Yonhap.

Істің мән-жайына сүйенсек, сот Ким Кен Хиді «Бірігу шіркеуінің» өкілінен бизнес саласында қолдау көрсету туралы өтініші үшін қымбат сыйлықтар (атап айтқанда, Chanel сөмкесі мен Graff алқасы) алғаны үшін кінәлі деп тапты. Сот өз сөзінде айыпталушының мемлекеттік маңызы бар лауазымды тұлғаның серігі ретіндегі беделін жеке басының мүддесіне пайдаланғанын, осылайша азаматтардың билікке деген сеніміне нұқсан келтіргенін атап өтті.

Дегенмен сот Ким Кен Хиге тағылған акциялармен манипуляция жасау және саяси қор туралы заңды бұзу сияқты ауыр айыптар бойынша оны ақтап алды. Прокуратура тарапы 15 жылға бас бостандығынан айыруды сұрағанымен, сот дәлелдердің жеткіліксіздігіне байланысты жазаны едәуір қысқартты. Түрме жазасынан бөлек, оған 12,8 миллион вон (шамамен 4 474 000 тг) көлемінде мүлікті тәркілеу міндеттелді.

Бұл оқиға Оңтүстік Корея тарихындағы теңдессіз жағдай болып отыр. Осы үкім арқылы Юн Сок Ёль мен Ким Кен Хи ел тарихында қылмыстық жауапкершілікке тартылып, бір мезгілде қамауға алынған алғашқы экс-президенттік жұп атанды. Бұған дейін Юн Сок Ёльдің өзі 2024 жылғы «әскери жағдай енгізу» әрекеті үшін 5 жылға сотталған болатын.

Қазіргі уақытта прокуратура мен қорғаушылар үкіммен келіспейтінін білдіріп, апелляциялық шағым түсіру мүмкіндігін қарастыруда. Тамыз айынан бері тергеу изоляторында отырған Ким Кен Хи өзіне тағылған айыптарды әлі де мойындамай отыр.