Келісім аяқталды: АҚШ пен Ресей арасында ядролық қарулану жарысы қайта бастала ма?

5 ақпанда Ресей мен АҚШ арасындағы стратегиялық шабуыл қаруларын шектеу туралы келісімнің мерзімі аяқталды. Бұл келісім әлемдегі ең ірі екі ядролық державаның қарулануын белгілі бір деңгейде ұстап тұруға мүмкіндік берген еді. Бұл жөнінде BBC-дің орыс қызметі хабарлады. 

Аталған құжат 2010 жылы қабылданып, кейін 2026 жылға дейін ұзартылған. Келісім бойынша екі ел ядролық оқтұмсықтар мен оларды тасымалдайтын зымырандар санын шектеп, бір-бірінің әскери әлеуетін бақылап отырған. Құжат стратегиялық тасымалдаушылар санын 800 бірлікпен, ал ядролық оқтұмсықтарды 1550 бірлікпен шектеді.

Алайда 2023 жылы Ресей келісімнің орындалуын тоқтатты. Ресей Сыртқы істер министрлігі мұны АҚШ-тың зымыранға қарсы қорғаныс саласындағы әрекеттері келісімнің негізгі қағидаттарына қайшы келіп, стратегиялық тепе-теңдікті бұзды деп түсіндірді.

Келісім мерзімі аяқталған соң тараптарды ядролық қаруды шектейтін нақты міндеттемелер қалмай отыр. АҚШ президенті Дональд Трамп болса, келісімнің аяқталуына байланысты «мерзімі бітсе бітсін, бұдан да жақсы келісім жасаймыз» деп мәлімдеді.

Сарапшылардың пікірінше, мұндай келісімнің болмауы ядролық қарулану жарысының қайта күшеюіне әкелуі мүмкін. Себебі елдер бір-бірінің нақты ниетін білмей, қауіптеніп, қару-жарақты арттыруға ұмтылады.

Алдағы жылдары АҚШ та, Ресей де ядролық күштерін жаңартуға қомақты қаражат жұмсауды жоспарлап отыр. Бұл әлемдік қауіпсіздікке қатысты алаңдаушылықты күшейтуде.