Израиль әскері Газаға әуе соққыларынан кейін атысты тоқтату режиміне қайта оралды

Израиль қорғаныс күштері (ЦАХАЛ) Газа секторына жасалған әуе соққыларынан кейін атысты тоқтату режиміне қайта оралды. Бұл жөнінде BBC-дің орыс қызметі хабарлады.

Әскерилердің мәліметінше, ХАМАС келісім шарттарын өрескел бұзған. Израиль тарапының айтуынша, палестиналықтар «сары сызық» деп аталатын аймаққа, яғни АҚШ арағайындығымен жасалған келісім бойынша израиль әскері шегінген аумаққа бірнеше рет шабуыл жасаған.

ЦАХАЛ мәлімдегендей, жексенбі таңертең ХАМАС жасаған шабуыл салдарынан екі израильдік сарбаз қаза тапқан, алайда радикалды топ бұл айыптауды жоққа шығарды.

«Террористер Рафах қаласы маңында террористік инфрақұрылымды жою операциясын жүргізіп жатқан Израиль армиясының сарбаздарына қарсы танкіге қарсы зымыран және атыс қаруларын қолданды. Жауап ретінде Армия қорғаныс мақсатында сол аумаққа соққы жасады», – делінген Израиль армиясының ресми хабарламасында.

Израиль бұл оқиғаны «атысты тоқтату туралы келісімді өрескел бұзу» деп бағалап, қажет болған жағдайда қатаң шаралар қолданатынын ескертті.

Кешке қарай ЦАХАЛ әуе шабуылдарының сериясынан кейін атысты тоқтату режимін қайта енгізгенін мәлімдеді.

«Израиль армиясы атысты тоқтату келісімін сақтайды, бірақ оның кез келген бұзылуына қатаң жауап береді», – делінген мәлімдемеде.

ХАМАС мәліметінше, Израильдің жауап соққылары салдарынан Газа секторында кемінде 45 адам қаза тапқан. Бұл деректі AFP агенттігіне төрт жергілікті аурухана да растаған.

Айта кетейік, атысты тоқтату туралы келісім 10 қазанда күшіне енген. Оның алғашқы кезеңінде Израиль тірі қалған барлық тұтқынды босатып, 28 мәйіттің 12-сін қайтарған. Ал Израиль билігі 250 палестиналық тұтқынды және Газа секторынан 1718 адамды босатып, сондай-ақ 15 палестиналықтың сүйегін қайтарған.