Дефлимпиада: саңырау көрермендерге спортты сезінуге көмектесетін жаңа шешім таныстырылды

Жапония астанасында өткен Дефлимпиада ойындарында саңырау және есту қабілеті төмен жанкүйерлерге спорт атмосферасын толық сезінуге мүмкіндік беретін инновациялық технологиялар сынақтан өтті. Биылғы жарыстар инклюзивті цифрлық шешімдерді тәжірибеден өткізетін маңызды алаңға айналды, деп хабарлайды BBC.

Үстел теннисі аренасында ойын барысындағы соққылар мен доптың қозғалысы экранда жапондық ономатопея сөздері арқылы визуалды түрде көрсетілді. Әрбір соққы арнайы анимациялық белгілермен бейнеленіп, дыбыс көрінетін ақпаратқа айналды. Бұл тәсіл әсіресе спортқа жаңадан келген көрермендер үшін ойын динамикасын түсінуге көмектесті.

Қала инфрақұрылымында да жаңа шешімдер енгізілді. Toei Metro станцияларында орнатылған мөлдір экрандар дыбысты мәтінге автоматты түрде аударып, жолаушыларға хабарламаларды қолжетімді етті. Ал Fujitsu компаниясы әзірлеген жасанды интеллект жүйесі вокзалдағы хабарландырулар мен дабыл дыбыстарын мәтін және ым тілі форматына түрлендірді.

Tokyo Budokan аренасында дзюдо жарыстарында Hapbeat құрылғылары қолданылды. Арнайы датчиктер арқылы спортшылардың қозғалысы мен соққылары діріл сигналына айналып, жанкүйерлер матчты «сезіну» мүмкіндігіне ие болды. Сонымен қатар Pixie Dust Technologies әзірлеген Sound Hug құрылғылары музыканы жарық пен діріл арқылы жеткізді.

Ұйымдастырушылардың мәліметінше, бұл бастамалар болашақта спорттық іс-шараларды баршаға қолжетімді етудің жаңа үлгісін қалыптастыруға бағытталған.