ДДСҰ артық салмағы бар балаларды операция мен дәрі-дәрмексіз емдеудің жолын айтты

Дүниежүзілік денсаулық сақтау ұйымы балалар мен жасөспірімдердегі семіздікпен күресуге арналған жаңа жаһандық ұсыныстарын жариялады. Ұйым мамандары 10 жасқа дейінгі балаларды емдеуде арықтататын екпелер мен дәрілерден түбегейлі бас тартып, басты назарды дұрыс тамақтану мен спортқа аударуды талап етіп отыр.

ДДҰ өкілдері салмақ түсіретін заманауи GLP-1 препараттарының балалар ағзасына тигізер ұзақ мерзімді әсері әлі толық зерттелмегенін ескертеді. Сондықтан мұндай дәрілік заттар тек басқа әдістерден нәтиже шықпаған жағдайда, тек жасөспірімдерге ғана тағайындалуы тиіс. Ал хирургиялық операциялар аса ауыр дәрежедегі семіздікке шалдыққан жастарға 6 айлық нәтижесіз емнен кейін ғана соңғы шара ретінде қарастырылмақ.

Бұл ұсыныстардың артында үлкен дабыл жатыр. Соңғы деректерге сүйенсек, әлемде 5 пен 19 жас аралығындағы 400 миллион бала артық салмақтан зардап шегсе, оның 170 миллионы семіздік диагнозына шалдыққан. АҚШ пен Еуропада Wegovy және Saxenda сияқты танымал препараттар 6–12 жастан бастап қолдануға рұқсат етілгеніне қарамастан, ДДҰ басты шешім медикаменттерде емес, отбасылық өмір салтын өзгертуде екенін қатаң ескертеді.