БҰҰ сарапшылары: Эпштейн ісіндегі қылмыстар «адамзатқа қарсы қылмыс» санатына жатуы мүмкін

БҰҰ Адам құқықтары жөніндегі кеңесі тағайындаған тәуелсіз сарапшылар тобы атышулы кәсіпкер Джеффри Эпштейннің ісіне қатысты жарияланған материалдарды зерттей келе, бұл істің ауқымы «адамзатқа қарсы қылмыс» белгілеріне сай келетінін мәлімдеді, деп хабарлайды Reuters.

Сарапшылардың пікірінше, АҚШ Әділет министрлігі жариялаған миллиондаған файлдар әйелдер мен қыздарды тауар ретінде пайдаланған және оларды адам кейпінен айырған жаһандық қылмыстық жүйенің бар екенін айғақтайды. Мәлімдемеде бұл зұлымдықтардың нәсілшілдік, коррупция және шектен шыққан мизогиния жағдайында жасалғаны, ал олардың жүйелі сипаты мен трансұлттық ауқымы халықаралық құқықтық деңгейдегі ең ауыр қылмыстар санатына жататыны ерекше атап өтілген.

Сарапшылар тобы бұл деректер бойынша шұғыл түрде тәуелсіз және бейтарап тергеу жүргізуді, сондай-ақ мұндай ауыр қылмыстардың ондаған жылдар бойы қалайша жазасыз қалып келгенін анықтауды талап етіп отыр. Қазіргі таңда жарияланған құжаттарда 1200-ден астам зардап шегуші анықталған, алайда ақпаратты толық ашпау немесе мәліметтерді өңдеу кезіндегі олқылықтар құрбандарды қайтадан психологиялық соққыға жығып, олардың «институционалдық газлайтингке» ұшырауына себеп болған. Айта кетейік, АҚШ Конгресі қабылдаған заңға сәйкес Эпштейнге қатысты барлық файлдар ашық жариялануы тиіс. Бұл құжаттар марқұм кәсіпкердің саясат, қаржы және бизнес әлеміндегі көптеген ықпалды тұлғалармен тығыз байланыста болғанын әшкерелеп отыр.