Биыл Ресей мен Украина арасында бейбітшілік орнауы екіталай – Еуропалық барлау қызметтері

Еуропаның бес бірдей барлау қызметінің басшылары 2026 жылы Украинадағы соғысты тоқтату туралы келісімге қол жеткізу мүмкіндігін төмен деп бағалады. Бұл туралы Reuters агенттігі анонимдік дереккөздерге сілтеме жасап хабарлайды.

Барлау қызметтерінің өкілдері Кремльдің соғысты тез арада аяқтауға ниетті емес екенін айтады. Сөйлесушілердің пікірінше, Ресей билігі АҚШ-пен жүріп жатқан келіссөздерді санкцияларды алып тастау және тиімді сауда мәмілелерін жасау үшін қысым құралы ретінде пайдалануда. Дереккөздердің бірі Женевадағы келіссөздерді «театрландырылған қойылым» деп атады.

Ресейдің негізгі мақсаттарының ішінде мыналар атап өтілді:

• Украина президенті Владимир Зеленскийді биліктен тайдыру;
• Украинаны Батыс пен Ресей арасындағы бейтарап «буферлік аймаққа» айналдыру.

Кремль келіссөздерді екі бағытқа бөлгісі келеді: соғысты тоқтату және АҚШ-пен екіжақты экономикалық келісімдер (санкцияларды жою). The Economist басылымы хабарлағандай, Ресей Қауіпсіздік кеңесі Путин мен Трамптың Аляскадағы кездесуі қарсаңында экономикалық ынтымақтастық туралы «ұлы мәміле» жобасын дайындаған. Бұл ұсыныстар тек Трамптың ғана емес, ресейлік бизнес элитасының да мүддесін көздейді.

Жақында Женевада Ресей, Украина және АҚШ арасындағы үшжақты келіссөздердің үшінші кезеңі аяқталды. Оның нәтижелері бойынша:

• Ресей делегациясының басшысы Владимир Мединский талқылауды «ауыр, бірақ іскерлік сипатта» деп бағалады.
• Президент Владимир Зеленский тараптардың «әскери бағыт» бойынша ілгерілеушілік бар екенін, бірақ саяси мәселелерде әлі де келіспеушіліктер көп екенін атап өтті.

Бұған дейін, 4–5 ақпанда Абу-Дабиде өткен кездесудің нәтижесінде тараптар «157-ге 157» форматында әскери тұтқындармен алмасқан болатын.

Зеленскийдің айтуынша, Вашингтон тараптарды осы жылдың маусым айына дейін бейбіт келісімге келуге итермелеуде. Мюнхен қауіпсіздік конференциясында Украина президенті АҚШ тарапынан бейбітшілік үшін Украинаның «өте жиі» жол беруін (уступка) талап ететініне наразылық білдірді.