Бишімбаевтың анасы бұрынғы келінінен 14 млн теңге талап етті: сот шешімі шықты

Астананың мамандандырылған ауданаралық экономикалық соты Қуандық Бишімбаевтың анасы Альмира Нұрлыбекованың бұрынғы келіні Назым Қахарманға қарсы талабын ішінара қанағаттандырды. Сот Қахарманнан 6,6 млн теңгеден астам қаражат өндіру туралы шешім шығарды.

Іс материалдарына сәйкес, 2023 жылғы қарашада Нұрлыбекова Назым Қахарманға бір үй-жайды 2029 жылғы 31 қазанға дейін сенімгерлік басқаруға берген. Нұрлыбекова бұрынғы келіні нысанды жалға беруден табыс тапқанымен, одан түскен ақшаны өзіне бермегенін және растайтын құжаттармен толық есеп ұсынбағанын мәлімдеген.

Талапкер соттан Назым Қахарманның жеке кәсіпкерлігінен шарт талаптарын тиісінше орындамағаны үшін 14 074 771 теңге, мемлекеттік бажға жұмсалған 247 415 теңге және өкіл қызметіне төленген 800 мың теңгені өндіріп беруді сұраған. Ал жауапкер талап етілген соманың көлемі мен негізі дәлелденбегенін айтып, талапты қанағаттандырмауды өтінген.

Сот тараптар ұсынған құжаттарды, оның ішінде жалға алушылардан түскен қаражат, жасалған төлемдер мен есептер туралы мәліметтерді зерттеп, талапты ішінара қанағаттандырды.

Сот шешімі бойынша Назым Қахарманнан 6 665 391 теңге, 66 654 теңге мемлекеттік баж және 666 539 теңге өкіл қызметінің шығыны өндірілмек. Қалған талаптар қанағаттандырылған жоқ.

Сот өндірілетін соманы есептегенде жауапкердің қолына нақты түскені құжатпен расталған және кейін қайтарылмаған немесе сенімгерлік басқару шарты бойынша шығындарға жұмсалмаған қаражатты ғана ескерген.

Сот шешімі әзірге заңды күшіне енген жоқ және оған шағым берілуі мүмкін.

Биыл ақпанда Альмира Нұрлыбекова жәбірленуші ретінде танылған алаяқтық ісі бойынша да үкім шыққан еді. Іс материалдары бойынша Бекзат Кемелова Қуандық Бишімбаевтың соты кезінде ақша бұғатталып, тәркіленуі мүмкін екенін айтып, Нұрлыбековадан 990 мың долларды уақытша сақтауға алған. Кемелова 6 жыл 8 айға бас бостандығынан айырылып, жазаны өтеу бір жылға кейінге қалдырылған.

Қуандық Бишімбаев 2024 жылғы 13 мамырда азаматтық некедегі жары Салтанат Нүкенованы азаптап, аса қатыгездікпен өлтіргені үшін 24 жылға бас бостандығынан айырылған.