Алтынның қымбаттауы үнді нарығындағы сұранысты қалай өзгертті?

Алтын бағасының рекордтық деңгейге көтерілуі Үндістандағы көпжылдық дәстүрлерге өзгеріс енгізуде. Әлемдегі ең ірі алтын тұтынушы елдердің бірі саналатын Үндістан халқы биыл мерекелік маусымда қымбат әшекейлерден бас тартып, инвестициялық алтын монеталар мен құймаларды сатып алуға көшкен, деп хабарлайды Reuters

Сарапшылардың айтуынша, бұл үрдіс алтынға деген жалпы сұраныстың төмендеуін тежеп тұр және 2026 жылға дейін жалғасуы мүмкін. Мәселен, сатып алушылар зергерлік бұйымдарды жасағаны үшін төленетін қосымша 15% үстемеақыны (making charges) артық шығын деп санайды. Сонымен қатар бюджетін үнемдегісі келетіндер салмағы жеңіл дизайн мен тазалығы төменірек (14 және 18 караттық) бұйымдарды таңдай бастаған.

Дүниежүзілік алтын кеңесінің (WGC) деректеріне сүйенсек, 2025 жылдың алғашқы тоғыз айында Үндістанда зергерлік бұйымдарды тұтыну 26%-ға азайған, ал алтынға инвестиция салу 13%-ға өскен. Нәтижесінде инвестициялық алтынның үлесі жалпы сұраныстың рекордтық 40%-ын құрады. Сала мамандары алтын бағасының одан ары өсуіне байланысты халықтың алтынды тек сәндік бұйым емес, сенімді актив ретінде сақтауға деген қызығушылығы арта түсетінін болжап отыр.