Алтын рекордтық деңгейде арзандады. Себебі неде?

21 қазан күні Нью-Йорктың COMEX биржасында желтоқсан айындағы алтын фьючерстерінің бағасы бір күн ішінде 6%-ға жуық төмендеп, 12 жылдағы ең ірі құлдырауды тіркеді. Бұл жөнінде Financial Times хабарлады.

Сауда барысында алтынның бір унциясының бағасы $4176-дан $4093-қа дейін түсіп кетті. Бұған ұқсас төмендеу соңғы рет 2013 жылы болған.

Алтынмен бірге басқа да бағалы металдардың бағасы да арзандады: күміс, платина және палладий 6–8% шамасында төмендеген.

Мамандардың айтуынша, мұндай өзгеріске бірнеше фактор әсер етті. Ең алдымен, АҚШ президенті Дональд Трамп пен Қытай төрағасы Си Цзиньпиннің алдағы аптадағы кездесуі инвесторлардың қауіпсіз активтерге деген сұранысын азайтқан. Кездесуде екі ел арасындағы сауда қатынастарын реттеу мәселесі талқыланбақ.

Сонымен қатар АҚШ-тағы үкіметтің уақытша жұмысын тоқтатуы (шатдаун) трейдерлерге маңызды апталық деректердің жетпеуіне әкелді. Бұл жағдай алтын нарығындағы алыпсатарлықты күшейтіп, баға ауытқуын арттырды.

Сарапшылардың пікірінше, АҚШ долларының соңғы апталардағы нығаюы да алтын бағасына қысым жасаған.

"Нарықта толқу байқалады. Алтын соңғы алты аптада $1000-ға өсті, бұл шамадан тыс жоғары қарқын. Баға «стротосфералық» деңгейге жетті", – дейді MKS Pamp компаниясының сарапшысы Никки Шилс.

Еске салайық, 16 қазанда алтынның бағасы алғаш рет тарихта $4300-дан асып, 20 қазанда $4398 деңгейіне дейін көтерілген еді.