Әлемде ашаршылық қаупі күшейгенде, АҚШ-тың қоймаларындағы азық-түлік тонналап шіріп жатыр

АҚШ-тың халықаралық даму агенттігі (USAID) арқылы бөлінген гуманитарлық азық-түлік көмек әлемнің түкпір-түкпірінде қоймаларда шіріп жатыр. Бұл жағдай Дональд Трамп әкімшілігінің агенттікті жаппай қысқартуы мен қаржыландыруды тоқтатуы салдарынан орын алды.

Жарамдылық мерзімі өтіп барады

60 мың тоннадан астам азық-түлік: жоғары калориялы печенье, терапиялық қоспалар мен қоректік бидай өнімдері қазір АҚШ пен Дубайдағы қоймаларда сақтаулы тұр. Алайда олардың көпшілігінің жарамдылық мерзімі өтіп барады, ал кейбіреуі мүлде жойылып жатыр.

Мысалы, Дубайдағы USAID қоймасында сақталған 496 тонна жоғары калориялы печенье жақында өртеліп жойылды. Бұл азық 27 000-нан астам баланы бір ай бойы тамақтандыруға жетер еді. АҚШ үкіметі бұл өнімдерге 793 мың доллар жұмсаса, оларды жоюға тағы 100 мың доллар кетті.

Агенттіктің жұмысын тоқтату

Президент Трамптың бұйрығымен USAID қызметкерлерінің 94 пайызы қысқартылып, жобалардың 83 пайызы тоқтатылған. Осылайша, көмекке мұқтаж аймақтарға азық-түлік жеткізу тізбегі толық күйреді. Бангладештегі рохинжа босқындары, Судан, Мьянма және Эфиопия сынды елдерде миллиондаған адам өмір сүру үшін осындай азық-түлік көмегіне мұқтаж.

АҚШ Сенатының мүшесі Джинн Шахин бұл жағдайды «мүлдем ақылға қонымсыз» деп бағалап:

«Азық-түлік көмегі өмірді құтқаруға емес, өртелуге кетіп жатыр. Бұл салық төлеушілердің ақшасын қорлау», - деді.

Әлемдік қауіп

USAID бұрын әлемдегі ашаршылыққа қарсы күресте жетекші рөл атқарған болатын. Ал сарапшылардың айтуынша, ұйымның жойылуы жылына 369 мың баланың өміріне қауіп төндіруі мүмкін.

Mana Nutrition сияқты компаниялар қоймаларында тұрған азық-түліктердің шамамен 60 миллион адамға жетуі мүмкін екенін айтады. Алайда қазір олардың бәрі қолданыссыз күйде қалып отыр. Бұл тек материалдық шығын ғана емес, сонымен бірге адамдардың денсаулығы мен өміріне тікелей қауіп.

Автор: Әмір Жәнібек