АҚШ-та оқушылар арасында Эпштейн туралы даулы ойын тарады

АҚШ-тың бірнеше штатындағы мектеп оқушылары арасында атышулы миллиардер Джеффри Эпштейннің қылмыстық ісіне негізделген «Five Nights at Epstein’s» компьютерлік ойыны танымалдылыққа ие болуда. Бұл туралы шетелдік БАҚ-тар хабарлады.

Танымал «Five Nights at Freddy’s» (FNAF) хоррор-ойынының пародиясы ретінде жасалған бұл туынды қоғамда үлкен резонанс тудырды. Ойын сюжеті Эпштейнге тиесілі жеке аралда өрбиді. Ойыншылар «құрбан» рөлінде болып, қылмыскерлерден қашып, бес түн бойы аман қалуға тиіс.

Ойындағы басты қарсыластар ретінде Джеффри Эпштейн, Дональд Трамп және Стивен Хокингтің бейнелері («Эпштейн файлдарындағы» есімдерге сүйене отырып) қолданылған. Ойын дизайнында АҚШ Әділет министрлігі 2019 жылғы тінту кезінде жариялаған Эпштейн үйінің нақты фотосуреттері пайдаланылған. Кейіпкерлерді алдау немесе назарын аудару үшін бала дауыстарының дыбыстарын пайдалану қарастырылған.

Қазіргі уақытта Солтүстік Каролина және басқа да штаттардың мектеп әкімшіліктері шұғыл шаралар қабылдап жатыр. Мектептегі техникалық құрылғылардан аталмыш ойын ресурстарына кіруге бұғаттау қойылып, сілтемелердің таралу арналары тексерілуде. Ойынның ресми коммерциялық өнім емес, бейресми желілер арқылы таралуы оны бақылауды қиындатып отыр.

Сарапшылардың пікірінше, нақты қылмыстық оқиғалар мен адам саудасы секілді ауыр тақырыптардың ойын форматына айналуы жасөспірімдердің психологиясына және құндылықтар жүйесіне кері әсерін тигізуі мүмкін.