АҚШ Әділет министрлігі Эпштейн ісіне қатысы бар тағы 300 танымал тұлғаның есімін жариялады

АҚШ-тың Бас прокуроры Пэм Бонди Джеффри Эпштейннің ісіне қатысты құжаттарда есімдері аталған 300 саясаткер мен қоғам қайраткерінің тізімін ашық жария етті. Бұл туралы Бас прокурор Конгрестің Өкілдер палатасы мен Сенаттың Сот комитеттеріне жолдаған ресми есебінде мәлімдеді.

Пэм Бонди мен оның орынбасары Тодд Бланштың айтуынша, Әділет министрлігі «Эпштейн файлдарының ашықтығы туралы» заң аясында жариялауға тиіс барлық материалдарды толық ашқан. Дегенмен кейбір құжаттар адвокаттық және ішкі тергеу құпиялылығына байланысты әлі де шектеулі қолжетімділікте қалып отыр.

Жарияланған тізімде әлемдік деңгейдегі саясаткерлер, технологиялық алпауыттар мен мәдениет өкілдері бар. Атап айтқанда:

• Саясаткерлер: Дональд Трамп, Барак және Мишель Обама, Билл және Хиллари Клинтон, Камала Харрис, Нэнси Пелоси, Хаким Джеффрис;
• Технология және бизнес: Билл Гейтс, Марк Цукерберг, Илон Маск;
• Мәдениет және өнер: Роберт Де Ниро, Билл Косби, Вуди Аллен, Брюс Спрингстин, Боно, Бейонсе;
• Қоғамдық тұлғалар: Ханзада Гарри және Рим папасы Иоанн Павел II.

Әділет министрлігі тізімде есімі аталған тұлғалардың барлығы бірдей қылмысқа қатысты емес екенін ерекше атап өтті. Құжаттардағы есімдердің мәртебесі әртүрлі:

«Тізімге ену тұлғаның заңсыз әрекеттерге барғанын немесе Эпштейнмен тікелей байланыста болғанын дәлелдемейді. Кейбір адамдар Эпштейнмен немесе Гилейн Максвеллмен тікелей электрондық пошта арқылы байланысқан болса, енді біреулері құжаттардың ішіндегі баспасөз есептерінде немесе іске тікелей қатысы жоқ үзінділерде ғана аталған», - делінген министрлік хабарламасында.

Аталған іс бойынша Әділет министрлігінің заңгерлер тобы жалпы көлемі 6 миллион беттен асатын материалды сараптамадан өткізген. Нәтижесінде 3,5 миллионнан астам бет халық назарына ұсынылды.

Құжаттарды жариялау барысында зардап шеккендердің құқығын қорғау мақсатында олардың есімдері мен жеке сәйкестендіру мәліметтері толықтай құпияландырылған. Бұл шаралар істің ашықтығы мен жеке тұлғалардың құпиялылығы арасындағы теңгерімді сақтау үшін қабылданған.