Ақ ажал: Жапониядағы рекордтық қар қалайша 46 адамның өмірін қиды?

Күн шығыс елінде соңғы апталарда толассыз жауған рекордтық деңгейдегі қар салдарынан жағдай күрделене түсті. Ресми мәліметтерге сәйкес, табиғи апаттан 46 адам қаза тауып, тағы 558 адам түрлі дәрежедегі жарақат алған. Бұл туралы Bild материалдарына сілтеме жасап Qrnews хабарлайды.

Қаңтар айының соңынан басталған қалыптан тыс қар жаууы Жапонияның солтүстік аймақтарында бұрын-соңды болмаған үйінділер тудырды. Кейбір елді мекендерде қардың биіктігі бір метрден асса, таулы аймақтарда төрт жарым метрге дейін жеткен.

Жапония билігінің хабарлауынша, адам өліміне негізінен мына факторлар себеп болған:

• Ғимарат шатырларынан жиналған қалың қардың адамдар үстіне құлауы;
• Қардың салмағын көтере алмай, тұрғын үйлердің қирауы;
• Көшелер мен жолдардың құрсауда қалуына байланысты көмектің кеш жетуі.

БАҚ мәліметінше, қар астында қалып қойған кейбір мәйіттер бірнеше күн бойы табылмаған.

Аомори және Аджигасава қалаларындағы жағдай өте қиын. Аомори губернаторы Соичиро Миясита қала әкімшілігінің көшелерді, теміржолдарды және тұрғын үйлерді қардан тазартуға қауқары жетпей жатқанын мәлімдеді.

Осыған байланысты, ақпан айының басында губернатор елдің Қарулы Күштерінен көмек сұрады. Қазіргі таңда Жапония армиясының сарбаздары апат аймағында жұмыс істеп жатыр. Олар бірінші кезекте жалғызбасты қарттар мен мүгедектігі бар жандардың үйлерін тазартуға және стратегиялық маңызы бар нысандарды қалпына келтіруге жұмылдырылған.

Мамандардың болжамынша, елдің солтүстік бөлігінде жауын-шашын әлі де жалғасуы мүмкін, бұл қауіп деңгейін жоғарылата түспек.