14 қазақстандық соғыс аймағынан қайтарыла ма? СІМ жауап берді

Қазақстан Сыртқы істер министрлігі соғыс аймағындағы 14 қазақстандық 8 қазанда елге қайтарылады деген ақпаратты жоққа шығарды. Бұл туралы СІМ ресми өкілі Жанболат Үсенов мәлімдеді.

Бұған дейін әлеуметтік желіде 14 қазақстандық бүгін Ресейдегі Қазақстан елшілігіне жеткізіледі деген ақпарат тараған. СІМ бұл мәліметтің шындыққа сәйкес келмейтінін хабарлады.

«Біз бұл тақырыптың қоғам үшін, әсіресе азаматтарымыздың туыстары үшін қаншалықты маңызды екенін түсінеміз. Сондықтан тексерілмеген ақпарат таратуға жол беруге болмайды. Бұл жақындарынан хабар күтіп отырған отбасыларды жаңылыстырып, жалған үміт тудырады және министрліктің азаматтарды қорғау жөніндегі жұмысына кедергі келтіруі мүмкін», – деді Үсенов.

Оның айтуынша, Сыртқы істер министрлігі Қазақстан азаматтарын қайтару мәселесі бойынша Ресей тарапымен жұмысты жалғастырып жатыр. Мәселе министрліктің тұрақты бақылауында.

2 қазанда СІМ соғыс жүріп жатқан аймақтардан елге қайтаруды сұраған қазақстандықтардан өтініш түскенін хабарлаған.

7 қазанда министрлік азаматтарды қайтару мәселесі бойынша Ресей тарапымен келіссөз жүріп жатқанын мәлімдеді. Алайда олардың нақты қашан елге жеткізілетіні әзірге айтылған жоқ.