Жойқын су тасқыны: қаза тапқандар саны 400-ден асты

Индонезияның Суматра аралында бірнеше күн бойы толассыз жауған нөсер мен тропикалық «Senyar» дауылының салдарынан ірі су тасқыны болды. Құтқару қызметінің соңғы мәліметіне сәйкес, апаттан қаза тапқандар саны 442 адамға жеткен. Тағы жүздеген тұрғын із-түзсіз деп саналып отыр.

Табиғи апат әсіресе Солтүстік Суматра, Батыс Суматра және Ачех провинцияларында күшті сезілген. Өзендер арнасынан асып, ондаған ауылды су шайып кеткен. Көптеген жолдар мен көпірлер қирап, кей аймақтарға бару мүмкін болмай қалды.

Құтқарушылар лай көшкіні мен қатты ағынның кесірінен бірқатар ауылдармен байланыс орната алмай жатыр. Эвакуациялық орталықтарда мыңдаған адам орналасқан. Тұрғындар ауызсу мен азық-түлік тапшылығын сезініп отыр.

Мамандардың айтуынша, циклонмен бірге келген нөсердің қарқындылығы климаттың өзгеруімен байланысты. Жаңбыр маусымы жыл сайын күшейіп, табиғи апаттардың көлемі ұлғайып келеді.

Индонезия билігі зардап шеккен аудандарға әскери-теңіз күштерін, тікұшақтар мен құтқару топтарын жіберді. Іздеу-құтқару жұмыстары әлі де жалғасуда.