Жапонияда заңсыз мигранттарды әшкерелегендерге сыйақы тағайындалды

Күн шығыс елінің Ибараки префектурасы қоғамды дүр сілкіндірген ерекше бастама көтерді. Енді заңсыз жұмыс істеп жүрген шетелдіктер мен оларды жалдаған жұмыс берушілер туралы ақпарат берген азаматтарға 10 000 иен (шамамен 63 доллар) көлемінде ақшалай сыйақы төленбек, деп хабарлайды Kyodo.

Токионың солтүстік-шығысында орналасқан бұл аймақ соңғы төрт жыл бойы заңсыз еңбек миграциясы бойынша елде көш бастап тұр. Осыған байланысты жергілікті билік 2026 қаржы жылынан бастап арнайы сыйақы жүйесін енгізуді жоспарлап отыр. Алайда, ақша тек ақпарат расталып, күдіктілер тұтқындалған жағдайда ғана беріледі.

Префектура губернаторы Казухико Ойгава бұл шараның шетелдіктерді қудалауға еш қатысы жоқ екенін айтып ақталды:

«Біздің мақсатымыз - заңсыз еңбекке жол бермейтін қоғам құру. Бұл шетелдіктердің ел өміріне толыққанды қатысуы үшін қажетті шарт», - деді ол.

Дегенмен құқық қорғаушылар мен адвокаттар палатасы бұл жоспарға үзілді-кесілді қарсы шығып отыр. Олардың пайымдауынша, ақшалай сыйақы көршілер арасында күдік тудырып, қоғамда дискриминация мен әлеуметтік алауыздықты өршітеді.

 «Адамдар кез келген шетелдікке күдікпен қарайтын болады», - деп ескертеді белсенділер.