Жапаров Қырғызстанның сыртқы қарызы қанша екенін айтты

Қырғызстанның қазіргі мемлекеттік қарызы 8,4 миллиард АҚШ долларын құрайды. Оның ішінде 62 пайызы немесе 5,2 миллиард доллар – сыртқы қарыз. Бұл жөнінде ел президенті Садыр Жапаров мәлімдеді.

Мемлекет басшысы Қырғызстанның 2035 жылға дейін сыртқы қарызын толық әрі қиындықсыз өтейтінін айтты.

Сонымен қатар Садыр Жапаров елде алдағы мерзімінен бұрын өтетін парламент сайлауы кезінде ешқандай төңкеріс болмайтынын атап өтті.

«Төңкеріс болмайды. Біріншіден, оған себеп болмайды. Екіншіден, Қырғызстан бұрынғы әлсіз мемлекет емес. Қазір мемлекет мықты. Үшіншіден, халық кімді қолдау керегін және кімнің билікте болатынын жақсы біледі», – деп жазды ол Facebook парақшасында.

Президенттің айтуынша, ел ішінде жұртты арандатып, сайлау кезінде тұрақсыздық орнайды деп үміттенетін кейбір “жаман ниетті” топтар бар. Олардың арасында сот шешімімен мемлекетке мүлкі мен қаражаты тәркіленген коррупционерлер, сондай-ақ лауазымынан айырылып, кек алғысы келетін бұрынғы шенеуніктер бар.

«Басқаша айтқанда, жеке пайдасын ойлап, өзін “құрбан” етіп көрсететіндер», – деді Жапаров.

Айта кетейік, Қырғызстан тәуелсіздік алғаннан бері үш рет мемлекеттік төңкеріс бастан кешті:
– 2005 жылы – Асқар Ақаев,
– 2010 жылы – Құрманбек Бакиев,
– 2020 жылы – Сооронбай Жээнбеков биліктен кеткен.

Мерзімінен бұрын өтетін парламент сайлауы 2025 жылғы 30 қарашада өтеді.