Жаңа ереже: Бұдан былай той тек 22:00-ге дейін өтеді, сосын электр өшіріледі

Қырғызстанда түнгі уақыттағы тыныштық режимін бұзу фактілері көбейген соң, билік қатаң тәртіп енгізді. Кабинет министрлерінің төраға орынбасары және Мемлекеттік ұлттық қауіпсіздік комитетінің басшысы Камчыбек Ташиев елдегі барлық той, ойын-сауық шаралары, кафе, мейрамхана және түнгі клубтардың жұмысы 22:00-де толық тоқтауы тиіс екенін мәлімдеді. Бұл жөнінде АКИpress хабарлады.

Оның айтуынша, бұл шешім қолданыстағы «тыныштық туралы» заңға сәйкес қабылданған. Алайда құжат күшіне енгенімен, жергілікті органдардың тарапынан бақылау әлсіреп, талап орындалмай отырғаны байқалған.

Ташиев мысал ретінде жақында орын алған жағдайларды келтірді. Оның сөзінше, Бішкекте әріптесінің тойы түнгі он екеге дейін жалғасқан, бірақ ешбір орган араласпаған. Дәл осындай жайт Жалалабадта да қайталанған. Онда да той жарты түнге дейін созылып, бақылаушы органдар әрекет етпеген.

Осыған байланысты ол жергілікті өзін-өзі басқару органдарын сынға алып, Кабминнің қаулысында олардың міндеттері нақты көрсетілгенін еске салды.

Ташиев енді ресми тапсырма беріп отыр: 22:00-ден кейін ел бойынша барлық той-томалақ, ойын-сауық іс-шаралары және қоғамдық тамақтану орындарының жұмысы тоқтауы тиіс. Егер талап орындалмаса, электр қуатын ажырату шарасы қолданылады.