Зеленский Ресейге “жер беру” мәселесі референдумда қарастырылуы мүмкін екенін айтты

Украина президенті Владимир Зеленский Ресеймен бейбіт келіссөздер аясында Донбасс мәселесін референдум арқылы қарастыру ықтимал екенін жоққа шығармады. Бұл туралы ол бейсенбі күні Киевте журналистермен кездесуде айтты, деп хабарлады Европейская правда.

Мемлекет басшысының сөзінше, қазіргі келіссөздердегі ең даулы тақырып – украин әскерін Донбастан шығару мәселесі. Бұл бағытта түрлі ұсыныстар түсіп жатыр.

«Америкалық тарап Донбастың Украина бақылайтын бөлігін “еркін экономикалық аймаққа” айналдыруды ұсынса, Ресей оны “бейтарап немесе демилитаризацияланған аймақ” деп атауды қалайды», – деді Зеленский.

Оның айтуынша, ұсынылған жоспарға сәйкес, украин әскері Донецк облысының өздері бақылап отырған аумағынан шығуы, ал ресейлік әскерлердің ол жаққа кірмеуі қарастырылған. Алайда Зеленский мұндай келісімді “Украинаның мүддесіне сай емес” деп бағалады.

Президент АҚШ ұсынған “компромисстік формат” бойынша екі елдің әскерлері белгілі қашықтыққа шегінуі мүмкін екенін айтты.

«Мәселен, олар 5 шақырым шегінсе, біз де 5 шақырымға шегінеміз. Егер олар 10 шақырым кетсе, біз де 10 шақырым. Әлемдік тәжірибе осылай. Бұл жерде бейтарап бақылау болуы керек», – деді ол.

Зеленский территория мәселесіне қатысты соңғы шешімді украин халқының өзі қабылдауы тиіс екенін атап өтті.

«Бұл сұраққа халықтың өзі жауап береді – сайлау немесе референдум арқылы», – деді ол.

Президенттің айтуынша, Украина ешқандай жағдайда Ресейдің Донбастың толық бақылауын алу талабын қабылдамайды.