Зеленский Лукашенкоға санкция енгізді

Украина Президенті Владимир Зеленский Беларусь басшысы Александр Лукашенкоға қатысты санкциялар енгізу туралы жарлыққа қол қойды. Шешім Украина Ұлттық қауіпсіздік және қорғаныс кеңесінің ұсынысы негізінде қабылданған.

Жарлыққа сәйкес, Лукашенкоға қатысты барлығы 17 түрлі шектеу шарасы қарастырылған. Олардың қатарында активтерді бұғаттау, елге кіруге тыйым салу, сауда және транзитті тоқтату, қаржылық операцияларға және технология беруге шектеу қою бар. Санкциялардың бір бөлігі мерзімсіз, ал кейбірі 10 жылға белгіленген.

Зеленский өз Telegram-арнасында бұл шешімді Беларусь басшылығының Украинаға қарсы әрекеттерге ықпал етуімен түсіндірді.

– Екінші жартыжылдықта Беларусь аумағында ресейлік тарап соққы жасайтын дрондарды басқаруға арналған ретрансляторлар жүйесін орналастырды. Бұл Ресей армиясының Киев облысынан Волыньге дейінгі солтүстік өңірлерге соққы жасау мүмкіндігін арттырды. Энергетикалық нысандар мен теміржол инфрақұрылымына жасалған кейбір шабуыл Беларусьтің көмегінсіз жүзеге аспас еді, – деп жазды Зеленский.

Украина президентінің мәлімдеуінше, үш мыңнан астам беларусьтік кәсіпорын Ресейге зымыран өндірісіне қажетті компоненттер жеткізеді. Сонымен қатар Беларусь аумағында «Орешник» баллистикалық зымыраны орналастырылған. 2025 жылдан бері ел кәсіпорындары аталған қаруға қажетті негізгі тораптар мен тетіктерді Ресейге жеткізіп отырғаны айтылды.

Айта кетейік, 25 қаңтарда Зеленский Вильнюсте Беларусь демократиялық күштерінің жетекшісі Светлана Тихановскаямен алғашқы ресми кездесу өткізген еді. Кездесу барысында санкциялық саясат пен Лукашенко режимін жауапкершілікке тарту стратегиясы талқыланған.

БАҚ мәліметінше, Украина тарапы Беларусь оппозициясымен бірге Лукашенкоға қатысты қылмыстық іс қозғау мүмкіндігін де қарастырып отыр. Мұндай қадам Беларусь басшысын халықаралық оқшаулаудан шығару әрекеттеріне тосқауыл қоюды көздейді.