WSJ: АҚШ Украинаға Ресей аумағына соққы жасауға қажет барлау деректерін береді

The Wall Street Journal басылымының хабарлауынша, АҚШ президенті Дональд Трамптың әкімшілігі Украинаға Ресейдің шекарадан алыста орналасқан нысандарына соққы беруге мүмкіндік беретін барлау мәліметтерін беруге келісті. Әңгіме энергетикалық инфрақұрылымға – мұнай өңдеу зауыттары, құбырлар мен электр станцияларына қатысты болып отыр.

Reuters агенттігінің дерегінше, Вашингтон Киевпен барлау деректерін бұрыннан бөлісіп келеді. Алайда бұл жолғы шешім Украинаның Ресейдің мұнайдан түсетін табысын азайтуға бағытталған қадамдарын жеңілдетпек.

WSJ-дың жазуынша, АҚШ өзге НАТО одақтастарына да осындай қолдау көрсету жөнінде ұсыныс жасаған. Бұған дейін Дональд Трамп Еуропа елдерін ресейлік мұнайдан толық бас тартуға шақырып, мұны Мәскеуге қарсы қатаң санкциялар енгізудің басты шарты деп атаған болатын.

Басылым дереккөздерінің айтуынша, шешім Трамптың әлеуметтік желідегі мәлімдемесінің алдында қабылданған. Онда ол Еуропалық одақтың көмегімен Украина өз аумағын бұрынғы шекарасына дейін қайтарып алуға қауқарлы екенін айтқан.

Сонымен қатар The Telegraph газеті хабарлағандай, 26 қыркүйекте БҰҰ Бас ассамблеясының кулуарында өткен кездесуде Украина президенті Владимир Зеленский Дональд Трамптан алыс қашықтыққа ұшатын «Томагавк» зымыранын беруді сұраған.

Бұл қару 2500 шақырымға дейінгі қашықтықтағы нысаналарды жоюға қабілетті. Яғни, Украина аумағынан атылған жағдайда Мәскеуді және Ресейдің еуропалық бөлігінің басым бөлігін нысанаға ала алады.