Владимир Зеленский: «Путин үшінші дүниежүзілік соғысты бастап жіберді»

Украина Президенті Владимир Зеленский Киевтегі үкімет резиденциясында BBC арнасына берген эксклюзивті сұхбатында Ресеймен арадағы соғыс, аумақтық жеңілдіктер және АҚШ-пен қарым-қатынас туралы маңызды мәлімдемелер жасады.

Зеленскийдің пайымдауынша, Ресей Президенті Владимир Путин үшінші дүниежүзілік соғысты іс жүзінде бастап қойған. Украина басшысы Путиннің мақсаты тек Украинаны жаулап алу емес, бүкіл әлемге басқаша өмір салтын таңу екенін атап өтті.

 «Мәселе оның қанша аумақты басып алатынында емес, оны қалай тоқтату керектігінде. Егер біз Путинді бүгін тоқтатпасақ, ол Украинамен шектелмейді. Сондықтан Украинаның жеңісі - бүкіл әлемнің жеңісі», - деді Президент.

Зеленский Ресей басып алған Донецк, Херсон және Запорожье облыстарының бір бөлігін беру арқылы соғысты тоқтату туралы ұсыныстарға үзілді-кесілді қарсы шықты. Ол бұл қадамды жай ғана «жер беру» емес, сол жерде тұратын жүз мыңдаған адамдарды тағдыр тәлкегіне тастау және қоғамды іштей іріту деп санайды.Президенттің пікірінше, кез келген уақытша бітім Путинге тек күш жинап, соғысты қайта бастау үшін қажет.

АҚШ-тың қазіргі Президенті Дональд Трамптың әскери көмекті тоқтатуына қарамастан, Зеленский Вашингтонмен стратегиялық байланысты үзбеуге тырысуда. Ол Украина үшін АҚШ-тағы президенттердің ауысуына қарамастан күшін жоймайтын, Конгресс арқылы бекітілген ұзақ мерзімді қауіпсіздік кепілдіктерінің маңыздылығын атап өтті.

«Президенттер өзгереді, бірақ институттар қалады. Бізге 30 жылға жететін кепілдіктер қажет», - деді ол.

Зеленский АҚШ-тың Украинада жазға дейін президенттік сайлау өткізу туралы талабына қатысты пікір білдірді. Ол сайлау өткізу техникалық тұрғыдан мүмкін екенін, бірақ ол үшін алдымен Украинаның қауіпсіздігі қамтамасыз етілуі және заңнамалық өзгерістер енгізілуі керектігін айтты.

Сондай-ақ, Президент серіктестерінің Украинаға Patriot секілді әуе қорғанысы жүйелерін өз елінде шығаруға лицензия бермей отырғанына қынжылыс білдірді.

Сұхбат соңында Владимир Зеленский Украинаның жеңісі - елдің тәуелсіздігін сақтап қалу және 1991 жылғы шекараға қайта оралу екенін мәлімдеді.

 «Бұл тек уақыт мәселесі. Біз өз жерімізді қайтарамыз, бірақ ол үшін әріптестеріміздің әскери және экономикалық қолдауы ауадай қажет», -  деп түйіндеді Украина Президенті.