Венгрияда сайлау алдында 330 мың адам көшеге шықты

Венгрияда 12 сәуірге жоспарланған парламенттік сайлау қарсаңында елдегі саяси температура шегіне жетті. 15 наурыз - Ұлттық мереке күні Будапешт көшелері екіге жарылды: бірінде 16 жыл билікте отырған Виктор Орбан жақтастарын жинаса, екінші жақта оның басты қарсыласы Петер Мадьяр бастаған оппозиция қалың нөпірмен «күш көрсетті».

Премьер-министр Орбан бұл сайлауды «тарихи таңдау» деп атап, халықты соғыс пен бейбітшіліктің бірін таңдауға шақырды. Ол өз қарсыластарын «Венгрияны Украинадағы соғысқа сүйреп кіргізбекші» деп айыптады.

«Біз бұрынғыдан да зор басымдықпен жеңуіміз керек», – деп ұрандатқан Орбан 2022 жылғы жеңісін қайталап қана қоймай, одан асып түсуді көздейтінін жеткізді.

Алайда, биыл Орбанның жағдайы мәз емес. Елдегі өмір сүру деңгейінің төмендеуі мен экономикалық тоқырау халықтың наразылығын тудырған. Петер Мадьяр мен оның «Тисза» партиясы сауалнамалар бойынша көш бастап тұр. Мадьяр Орбанды «билікті сақтап қалу үшін соғысты желеу етіп, үрей туғызуда» деп айыптады. Оның айтуынша, Венгрияның болашағы тек ЕО мен НАТО-ның құрамында.

Венгрия қоғамы екіге жарылды: бірі Орбанды «Еуропаның ең үздік саясаткері» деп санаса, енді бірі «Орбан тағы 4 жыл қалса, бұл елден көшуден басқа амал жоқ» деп қауіптенеді. 12 сәуірдегі дауыс беру тек Венгрияның емес, бүкіл Еуропаның саяси картасын өзгертуі мүмкін.